Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 190 Hüküm no: 144 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Ahmed oğlu Mustafa Çelebi’nin terekesinden diğer zevcesinin mehr-i müeccelini talebi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refî‘a kazâsı muzâfâtından Çekmece-i Kebîr nâhiyesine tâbi‘ Eşkinöz nam karyede sâkin iken bundan akdem vefât eden Mustafa Çelebi b. el-Hâc Ahmed’in ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Muhammedî ettikde müteveffâ-yı mezbûrun zevce-i menkûha-i metrûkesi olup zâtı Abdulbâki Efendi b. Mustafa ve Süleyman b. el-Hâc Ahmed ta‘rîfleriyle mu‘arrefe olan işbu râfi‘atü’l-kitâb Âişe Hatun bt. el-Hâc İsmail meclis-i ma‘kūd-ı mezkûrda müteveffâ-yı mezbûrun âhar zevce-i menkûha-i metrûkesi ve terekesinden bi’l-verâse vâzı‘atü’l-yed olup zâtı kezâlik mu‘arrifân-ı mezbûrân ta‘rîfleriyle mu‘arrefe olan Saliha Hatun bt. Hüseyin mahzarında üzerine da‘vâ ve takrîr-i kelâm edip zevcim Mustafa Çelebi b. el-Hâc Ahmed b. Abdullah zimmetinde mütekarrir ve ma‘kūdun aleyh on iki bin akçe mehr-i müeccel hakkım olup hattâ müteveffâ-yı mezbûr hâl-i huyûtunda ve kemâl-i sıhhatinde fevtinden üç sene mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘iye-i mezbûre Saliha’dan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup karye-i mezbûre sükkânından mu‘arrifân-ı mezbûrân Abdulbâki Efendi ve Süleyman Çelebi li-ecli’ş-şehâde meclis-i mezbûra hâzırân olup istişhâd olunduklarında fî’l-hakīka müteveffâ-yı mezbûr Mustafa Çelebi b. el-Hâc Ahmed b. Abdullah hâl-i huyûtunda ve kemâl-i sıhhatinde fevtinden üç sene mukaddem işbu müdde‘iye-i mezbûre Âişe Hatun zimmetinde mütekarrir ve ma‘kūdun aleyh on iki [bin] akçe mehr-i müeccel deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘di’l-ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Mustafa b. Sefer ve Mehmed b. İslam ile meclis-i şer‘a gelip her biri alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’s-sânî aşer min-Recebi’l-ferd li-sene selasîn ve mi’e ve elf. Şuhûdü’l-hâl: Molla Ali b. Mustafa, el-Hâc İbrahim Efendi b. Hasan İmâm, Ramazan Beşe b. Abdülkerim, İbrahim Beşe b. Mustafa, Hasan Beşe b. Ramazan, Hüseyin b. Mustafa.