Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 193 Hüküm no: 146 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Ahmed oğlu Mustafa Çelebi’nin kızına nafaka takdiri Havâss-ı Refî‘a kazâsı muzâfâtından Çekmece-i Kebîr nâhiyesine tâbi‘ Eşkinöz nam karyede sâkin iken bundan akdem vefât eden Mustafa Çelebi b. el-Hâc Ahmed’in sulbî sagīr oğlu Ali ve sulbiye sagīre kızı Fâtıma’nın vâlideleri ve hâdıneleri işbu bâ‘isetü’l-kitâb Saliha Hatun bt. Hüseyin meclis-i şer‘-i şerîf-i enverde takrîr-i kelâm ve ta‘bîr ani’l-merâm edip bi-hakkı’l-hıdâne hâlâ hacr ve terbiyemde olan sagīrân-ı mezbûrânın nafaka ve kisveye eşedd-i ihtiyâçları olmağla babaları müteveffâ-yı mezbûrdan müntakil mâllarından her birine kadr-i ma‘rûf kıbel-i şer‘den nafaka ve kisve bahâ farz [ve] takdîr olunmak bi’l-vesâye matlûbumdur dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sagīrân-ı mezbûrânın mâl-ı müntakillerinden her birine yevmî sekiz akçe nafaka ve kisve bahâ farz ve takdîr buyurup meblağ-ı mezbûru sagīrân-ı mezbûrânın nafaka ve kisve ve sâir levâzım-ı zarûriyye[sine] harc ve sarfa ve vakt-i hâcette istidâne ve inde’z-zafer mâl-ı müntakillerine rücû‘a mezbûre Saliha Hatun’a izin birle mâ-vaka‘a bi’t-taleb ketbolundu. Fî-gurreti Recebi’l-ferd sene selasîn ve mi’e ve elf. Şuhûdü’l-hâl: Ali Çelebi b. Mehmed, İbrahim Çelebi b. Hüseyin, Molla Ali b. el-Hâc Mustafa, Mehmed Çelebi b. İslam, Ramazan Beşe b. Abdülkerim, İbrahim Beşe b. Abdülkerim, İbrahim Beşe b. Mustafa, Hasan Beşe b. Ramazan, Mustafa b. Hüseyin.