Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 194 Hüküm no: 148 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahzen kâtibi Osman oğlu Ali Efendi’nin terekesinden zevcesinin alacağını talebi Mahmiye-i İstanbul’da Odun Kapısı kurbünde sâkin bakkal tâifesinden işbu râfi‘u’l-kitâb el-Hâc Ali b. Mehmed meclis-i şer‘-i şerîf-i enverde medîne-i hazret-i Ebâ Eyyüb el-Ensârî mahallâtından Arakıyyecibaşı mahallesinde sâkin iken bundan akdem vefât eden mahzen kâtibi Ali Efendi b. Osman’ın zevce-i menkûha-i metrûkesi olmağla terekesine bi’l-verâse vâzı‘atü’l-yed olan Havva Hatun bt. el-Hâc Osman b. Abdullah tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Mehmed Efendi b. Yusuf ve Süleyman Efendi b. Mehmed şehâdetleriyle sâbit ve sübût-ı vekâletine hükm-i şer‘î lâhık olan Emetullah Hatun b. ( ) mahzarında üzerine da‘vâ ve takrîr-i kelâm edip müteveffâ-yı mezbûr mahzen kâtibi Ali Efendi b. Osman b. Abdullah zimmetinde cihet-i karz-ı şer‘îden yüz yetmiş guruş hakkım olup hattâ müteveffâ-yı mezbûr hâl-i kemâl-i sıhhatinde fevtinden on beş gün mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup sâlifü’z-zikr Odun Kapısı kurbünde sâkin el-Hâc Musa b. Mehmed ve Mehmed Çelebi b. Mehmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mahzen kâtibi Ali Efendi b. Osman b. Abdullah hâl-i kemâl-i sıhhatinde fevtinden on beş gün mukaddem işbu müdde‘î-i mezbûr el-Hâc Ali b. [Osman] zimmetinde cihet-i merkūmeden yüz yetmiş guruş deyni olduğu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘di’l-ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’r-râbi‘ min-Recebi’l-ferd li-sene selasîn ve mi’e ve elf. Şuhûdü’l-hâl: İmâm Mehmed Efendi b. Yusuf, Süleyman Efendi b. Mehmed, İbrahim Çelebi b. Mehmed, Süleyman Ağa b. Mehmed, Mehmed Beşe b. İbrahim, Mustafa Çelebi b. Ahmed, el-Hâc Mustafa b. el-Hâc Mehmed, Mustafa Çelebi b. el-Hâc İbrahim.