Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 195 Hüküm no: 149 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed oğlu Mustafa Beşe’nin çocuklarına vasi tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Davud Ağa mahallesinde sâkin iken bundan akdem vefât eden Mustafa Beşe b. Mehmed’in sulbî sagīr oğlu İsmail ile sagīre kızı[ları] Rabi‘a ve Emetullah’ın vakt-i rüşd ve sedâdlarına değin kıbel-i şer‘den tesviye-i emrlerine bir vasî nasbı lâzım ve mühim olmağın emânet ile ma‘rûfe diyânet [52a] ile mevsûfe her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan sagīrûn-ı mezbûrûnun vâlideleri işbu râfi‘atü’l-kitâb Âişe Hatun bt. Abdullah’ın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrûn-ı mezbûrûnun vakt-i rüşd-i sedâdlarına değin tesviye-i emrlerine mezbûr Âişe Hatun’u vasî nasb ve ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’s-sânî aşer min-Recebi’l-ferd li-sene selasîn ve mi’e ve elf. Şuhûdü’l-hâl: Mustafa Efendi b. el-Hâc Mehmed, Mehmed Efendi b. Ali, el-Hâc İbr[a]him b. Maksud, Mustafa Çelebi b. Osman, Ömer Beşe b. Mehmed, Mustafa Beşe b. İbr[a]him, Mehmed Ağa b. Ali, Mehmed Bey b. Ahmed, Mehmed Beşe b. Veyis ve gayruhüm.