Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 195 Hüküm no: 150 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed oğlu Mustafa Beşe’nin çocuklarına nafaka takdiri Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Davud Ağa mahallesinde sâkin iken bundan akdem vefât eden Mustafa Beşe b. Mehmed’in sulbî sagīr oğlu İsmail ile sulbiye sagīre kızları Rabi‘a ve Emetullah’ın valideleri ve tesviye-i emrlerine kıbel-i şer‘den mansûbe vasiyeleri olan işbu râfi‘atü’l-kitâb Âişe Hatun bt. Abdullah meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vasiyeleri olduğum sıgār-ı mezbûrûnun nafaka ve kisve bahâya eşedd-i ihtiyâçları olmağla babaları müteveffâ-yı mezbûrdan müntakil mâllarından her birine kadr-i ma‘rûf nafaka ve kisve farz ve takdîr olunmak bi’l-vesâye matlûbumdur dedikde vasiyye-i mezbûre Âişe Hatun’un kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sıgār-ı mezbûrûnun babaları müteveffâ-yı mezbûrdan müntakil mâllarından her birine yevmî ikişer pâre nafaka ve kisve bahâ farz ve takdîr buyurup meblağ-ı mefrûz-ı mezbûru sıgār-ı mezbûr[ûn] İsmail ve Rabi‘a ve Emetullah’ın nafaka ve kisve bahâlarına harc ve sarfa ve lede’l-iktizâ istidâneye ve inde’z-zafer mâllarına rücû‘a vasiyye-i mezbûre Âişe Hatun’a izin vermeğin mâ-vaka‘a bi’t-taleb ketbolundu. Fi’l-yevmi’s-sâbi‘ ışrîn min-Recebi’l-ferd li-sene selasîn ve mi’e ve elf. Şuhûdü’l-hâl: Mustafa Çelebi b. ( ), el-Hâc İbr[a]him b. Maksud, Mustafa Efendi b. Hüseyin, es-Seyyid Mustafa b. Sefer, Mehmed Çelebi b. İslam.