Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 196 Hüküm no: 151 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed oğlu Süleyman Bey’in vârislerine vasi ve kayyım tayini Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Cezerî Kasımpaşa mahallesinde sâkin iken bundan akdem vefât eden Süleyman <> Bey b. Mehmed’in li-ebeveyn er karındaşları olup vilâyet-i Anadolu’da Gölhisar kazâsında sâkin Osman Ağa ve Ömer Ağa’nın hisse-i mevkūfelerini ahz u kabz [ve] zabt u hıfza kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûf diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olan işbu râfi‘u’l-kitâb eş-Şeyh Abdullah Efendi b. eş-Şeyh Mahmud Efendi b. ( ) hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi mezbûrân Osman ve Ömer Ağa’nın hisse-i mevkūfelerini ahz u kabz ve zabt u hıfza vasî ve kayyım nasb ve ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketbolundu. Fi’l-yevmi’r-râbi‘ ışrîn min-Recebi’l-ferd sene 1130. Şuhûdü’l-hâl: İbrahim Ağa b. Mehmed, Tatar Ahmed Ağa b. Abdurrahman, Ahmed Ağa b. Abdullah, Mehmed Ağa b. Ahmed, el-Hâc Süleyman Ağa b. Abdullah.