Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 406 Hüküm no: 474 Orijinal metin no: [64b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ümmühani bt. Ömer’den amcasının oğlu Receb Beşe’ye kalan para hissesinin tahsil edildiği Mahmiye-i İstanbul’da Nişancı Paşa mahallesinde sâkine iken bundan akdem vefât eden Ümmühâni bt. Ömer nâm sagīrenin verâseti zevc-i âhardan hâmil vâlidesi Mülâyim bt. Abdullah ile li ebeveyn ammi oğlu Receb Beşe nâm kimesneye münhasıra ve mezbûre Mülâyim iddi‘â-i haml etmekle tashîh-i mes’eleleri altı sehimden olup sihâm-ı mezbûrenin iki sehmi mezbûre Mülâyim’e ve bir sehmi haml için mevkūf kılınıp ve üç sehmi merkūm Receb Beşe’ye isâbet eylediği şer‘an zâhir ve mütehakkik oldukdan sonra mezbûr Receb Beşe meclis-i şer‘-i hatîrde sagīre-i mezbûrenin vasîsi ve terekesine vâzı‘ü’l-yed olan bâ‘isü’l-kitâb Yusuf Çelebi nâm kimesne mahzarında ikrâr ve takrîr-i kelâm edip mûrisem müteveffât-ı mezbûre Ümmühâni’nin defter-i kassâm mûcebince babasından intikāl edip vasiyy-i mezbûrun yedinde olan muhallefâtı yirmi dört bin sekiz yüz kırk akçe olup meblağ-ı mezbûrun bin yedi yüz otuz iki akçesini rızâmız ile sagīre-i mezkûrenin techîz ve tekfînine harc ve sarf edip bâkī yedinden yirmi üç bin yüz altı akçe kalmışidi meblağ-ı bâkī-i mezbûrdan bana isâbet eden on bir bin beş yüz elli üç akçe hissemi hâlen vasiyy-i merkūm Yusuf Çelebi yedinden tamâmen alıp kabz eyledim, min ba‘d meblağ-ı mezbûrdan merkūm Yusuf Çelebi yedinde bir akçe ve bir habbe hakkım kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Fahrü’l-kuzât Es-Seyyid Mustafa Efendi b. Mehmed, Ahmed Efendi b. Şeyh Mehmed el-İmâm, Mustafa Ağa b. Ömer, Yusuf Halîfe b. ( ) el-Müezzin, Hacı İbrahim b. Abdullah, Hacı Mehmed b. Mahmud, Hasan Çelebi b. İsmail, Şaban b. Mustafa, Mustafa Çelebi b. Ahmed, Mehmed Beşe b. Yusuf.