Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 202 Hüküm no: 157 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed oğlu Süleyman Ağa’nın terekesinden zevcesinin mehr-i müeccelini talebi Husûs-ı âti’l-beyânın mahallinde istimâ‘ ve tahrîr[i] için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Cezerî Kasımpaşa mahallesinde sâkin iken bundan akdem vefât eden Süleyman Ağa b. Mehmed’in ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Muhammedî ettikde müteveffâ-yı mezbûrun zevce-i menkûha-i metrûkesi olup zât-ı Ahmed Ağa b. Mustafa ve el-Hâc Mehmed b. Ahmed ma‘rifetleriyle mu‘arrefe olan işbu râfi‘atü’l-kitâb Âişe Hatun b. Abdullah meclis-i ma‘kūd-ı mezkûrda müteveffâ-yı mezbûrun karındaşları olup vilâyet-i Anadolu’da Köyhisar [Gölhisar] kazâsında sâkin Osman Ağa ve Ömer Ağa’nın hisse-i mevkūfelerini ahz u kabz [ve] zabt u hıfz[a] kıbel-i şer‘den vasî ve kayyım nasb olunan eş-Şeyh Abdullah Efendi b. Mahmud Efendi mahzarında üzerine da‘vâ ve takrîr-i kelâm edip müteveffâ-yı mezbûr Süleyman Ağa b. Mehmed b. Abdullah tezevvüc murâd ettikde fevtinden üç sene mukaddem iki yüz guruş mehr-i müeccel tesmiyesiyle beni tezevvüc ve kabûl edip akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunup alınıverilmesi matlûbumdur dedikde gıbbe’s-suâl mezbûr eş-Şeyh Abdullah Efendi müteveffâ-yı mezbûrun terekesine bi’l-vesâye vaz‘-ı yedini ikrâr lâkin meblağ-ı mezbûru inkâr edicek müdde‘iye-i mezbûreden müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahalle-i mezbûre sâkinlerinden müteveffâ-yı mezbûr <> Ahmed Ağa b. Mustafa ve el-Hâc Mehmed b. Ahmed nam kimesneler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fî’l-hakīka müteveffâ-yı mezbûr Süleyman Ağa b. Mehmed b. Abdullah tezevvüc murâd ettikde fevtinden üç sene mukaddem iki yüz guruş [55a] mehr-i müeccel tesmiyesiyle işbu müdde‘iye-i mezbûre Âişe Hatun’u tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli Mevlânâ-yı mezbûr mahallinde ketb ü tahrîr ba‘de ma‘an ba‘s olunan es-Seyyid Mustafa b. Sefer ve Mehmed b. İslam ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’s-sânî ve’l-ışrîn min-Recebi’l-ferd li-sene selasîn ve mi’e ve elf. Şuhûdü’l-hâl: el-Hâc İbr[a]him Ağa b. Mehmed Efendi, Mehmed Ağa b. Ebubekir, el-Hâc Süleyman Ağa b. Mehmed, Mehmed Ağa b. Ahmed, el-Hâc Ömer Ağa b. Abdullah.