Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 203 Hüküm no: 158 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Ali’nin Tersâne-i âmire kâtibi Osman oğlu Ali Efendi’nin terekesinden alacağını tahsil ettiği Bakkal tâifesinden olup mahmiye-i İstanbul’da Odun Kapısı’nda sâkin el-Hâc Ali b. ( ) meclis-i şer‘-i şerîf-i enverde medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Arakıyyecibaşı mahallesinde sâkin iken bundan akdem vefât [eden] Tersâne-i âmire kâtibi Ali Efendi b. Osman’ın düyûn-ı müsbetesi edâya kıbel-i şer‘den vasî ve kayyım nasb olunan zevce-i menkûha-i metrûkesi Havva Hatun bt. el-Hâc Osman tarafından tasdîka vekîl-i müsecceli işbu râfi‘atü’l-kitâb Emetullah Hatun bt. ( ) mahzarında ikrâr ve takrîr-i kelâm edip müteveffâ-yı mezbûr Ali Efendi zimmetinde bâ-hüccet-i şer‘iyye yüz yetmiş beş guruş hakkım olup müteveffâ-yı mezbûrun terekesi tahrîr ve ba‘de ihrâci’l-masârıf ber-mûceb-i defter-i kassâm-ı askerî guremâdan hisseme isâbet eden yüz otuz altı buçuk guruşdan müvekkile-i mezbûre Havva Hatun seksen beş guruşunu bana def‘ ü teslîm ben dahi yedinden ahz u kabz eyledikden sonra meblağ-ı bâkī-i mezbûr elli bir buçuk guruş mutâlebesinden müvekkile-i mezbûre Havva Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim fîmâ-ba‘d müvekkile-i mezbûre ile vechen mine’l-vücûh ve sebeben mine’l-esbâb asla ve kat‘â da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketbolundu. Fi’l-yevmi’l-hâmis ışrîn [min-] Recebi’l-ferd li-sene selasîn ve mi’e ve elf. Şuhûdü’l-hâl: Mehmed Efendi b. Yunus, Süleyman Efendi b. Mehmed, Mustafa Efendi b. Hüseyin, es-Seyyid Mustafa b. Sefer, Mehmed Çelebi b. İslam.