Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 406 Hüküm no: 475 Orijinal metin no: [64b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani bt. Ömer’den annesi Mülâyim bt. Abdullah’a kalan ev hissesinin Yusuf Çelebi’ye satıldığı Mahmiye-i İstanbul’da Nişancı Paşa mahallesinde sâkine iken bundan akdem vefât eden Ümmühâni bt. Ömer nâm sagīrenin verâseti zevc-i âhardan hâmil vâlidesi Mülâyim bt. Abdullah’a ve li ebeveyn ammi oğlu Receb Beşe nâm kimesneye münhasıra ve mezbûre Mülâyim iddi‘â-i haml etmekle tashîh-i mes’eleleri altı sehimden olup sihâm-ı mezbûrenin iki sehmi mezbûre Mülâyim’e ve bir sehmi haml için mevkūf kılınıp ve üç sehmi mezbûr Receb Beşe’ye isâbet eylediği şer‘an zâhir ve mütehakkik oldukdan sonra mezbûr Receb Beşe meclis-i şer‘de işbu bâ‘isü’l-kitâb Yusuf Çelebi b. ( ) mahzarında bi’l-vekâle ikrâr ve takrîr-i kelâm edip mahalle-i mezkûrda vâki‘ bir tarafdan Sarı Solak Mehmed Çelebi veresesi mülkleri ve bir tarafdan Musa Efendi b. Ali mülkü ve bir tarafdan Âlime Hâtun mülkü ve bir tarafdan tarîk-i âm ile mahdûd menzilin nısfı mezbûr Yusuf Çelebi’nin zevcesi Âişe bt. Hacı Ali’nin mülkü ve nısfı müteveffât-ı mezbûre Ümmühâni’nin terekesinden olmağla vech-i muharrer üzre menzil-i mezbûrun nısfından bana isâbet eden üç sehim hissemi merkūm Yusuf Çelebi’ye tarafeynden îcâb ve kabûlü hâvî bey‘-i bât ile yüz yedi buçuk esedî guruşa bey‘ ve teslîm edip ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr yüz yedi buçuk guruşu merkūm Yusuf Çelebi yedinden tamâmen ahz u kabz eyledim, ba‘de’l-yevm vech-i muharrer üzre menzil-i mezbûrda olan üç sehim hisse merkūm Yusuf Çelebi’nin mülk-i müşterâsıdır keyfe mâ yeşâ’ ve yahtâr tasarruf eylesin dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Es-Sâbikūn.