Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 210 Hüküm no: 166 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed oğlu Ali Çelebi’nin, Mehmed oğlu Süleyman Ağa’nın terekesinden alacağını talebi Medîne-i Üsküdar’da Davud Paşa mahallesinde sâkin işbu râfi‘u’l-kitâb Ali Çelebi b. Mehmed meclis-i şer‘-i şerîf-i enverde medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Cezerî Kasımpaşa mahallesinde sâkin iken bundan akdem vefât eden Süleyman Ağa b. Mehmed’in vilâyet-i Anadolu’da Gölhisar kazâsında sâkin li-ebeveyn er karında<<şı>>şları Ömer ve Osman Ağa’nın hisse-i mevkūfelerini ahz u kabz ve zabt u hıfza kıbel-i şer‘den vasî ve kayyım nasb olunan eş-Şeyh Abdullah Efendi b. Mahmud Efendi mahzarında üzerine da‘vâ ve takrîr-i kelâm edip müteveffâ-yı mezbûr Süleyman Ağa b. Mehmed b. Abdullah zimmetinde hüccet-i deyn-i şer‘den kırk sekiz guruş hakkım olup hattâ müteveffâ-yı mezbûr hâl-i hayâtında fevtinden otuz gün mukaddem meblağ-ı mezbûr hüccet-i mezbûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden medîne-i Eyüb’de Sofular mahallesinde sâkin İbr[a]him Ağa b. el-Hâc Ahmed b. Ebubekir li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Süleyman Ağa b. Mehmed b. Abdullah hâl-i hayâtında fevtinden otuz gün mukaddem hüccet-i deyn-i şer‘îden zimmetinde kırk sekiz guruş işbu müdde‘î-i mezbûr Ali Çelebi’ye vâcibü’l-edâ deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘di’l-ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’l-âşir min-Şa‘bâni’l-mu‘azzam sene 1130. Şuhûdü’l-hâl: Abdullah Ağa kethüdâ-i Aktarlar, Ahmed Ağa b. Mustafa, el-Hâc Süleyman b. Ali, Salih Çelebi b. Ali, es-Seyyid Mustafa b. Sefer, Mehmed Çelebi çukadâr.