Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 407 Hüküm no: 476 Orijinal metin no: [64b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekini içine öküzlerini sürüp zarara yol açtıkları gerekçesiyle açılan davadan şikâyetin ispat edilemediği Medîne-i Üsküdar nevâhîsinden Taşköprü nâhiyesinde Karsak? nâm karye sükkânından Mustafa Beşe b. Osman nâm kimesne meclis-i şer‘-i hatîr-i lâzımü’t-tevkīrde karye-i mezbûre sükkânından işbu ashâbü’l-kitâb Mustafa Beşe b. Yusuf ve Halil b. Mustafa ve Hüseyin b. Hasan ve Ali Beşe b. Ahmed ve Ahmed b. Ali nâm kimesneler mahzarlarında üzerlerine da‘vâ ve takrîr-i kelâm edip ben sefer-i hümâyûnda iken karye-i mezbûrda vâki‘ altmış beş keyl tohum mezrû‘ ve nâbit olunan hasâda karîb oldukdan sonra mezbûrûn Mustafa Beşe ve Halil Beşe ve Halil ve Hüseyin ve Ali Beşe ve Ahmed’in öküzlerinin ol tarlalara salıverip yüz keyl hubûb hâsıl olan ekinim istihlâk eylemişlerdir, mezbûrûndan suâl olunup yüz keyl hubûbun misli alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûrûn Mustafa Beşe ve Hüseyin ve Ali ve Ahmed müdde‘î-i mezbûrun vech-i mübeyyen üzre mezrû‘ ve nâbit olan tarlalarına öküzlerin salıverip yüz keyl hubûb hâsıl olur ekinini istihlâk etmediklerine yemîn teklîf olundukda merkūmûn Halil ve Hüseyin ve Ahmed’den her birleri alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Recebi’l-mürecceb li sene seb‘a ve seb‘în ve elf. Şuhûdü’l-hâl: Mehmed Bey b. Abdullah, Baba Resul b. Rıdvan, Hasan Çelebi b. Ahmed, İbrahim Çelebi b. Ahmed, Mehmed b. Ebûbekir, Veli b. Mahmud.