Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 225 Hüküm no: 178 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İbrahim oğlu Ahmed’in Rus asıllı kölesini azad ettiği Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî- mahallâtından Ali Paşa-yı cedîd mahallesi ahâlîsinden iken bundan akdem mahrûse-i Edirne’de müsâfiren vefât eden Ahmed b. İbr[a]him’in mahalle-i mezbûrede hayâtında sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde müteveffâ-yı mezbûrun verâseti zevce-i menkûha-i metrûkesi Rahime Hatun bt. Mustafa ile sulbî kebîr oğlu İbrahim ve sulbî sagīr oğlu Mehmed’e münhasıra olduğu şer‘an zâhir ve müte‘ayyin oldukdan sonra mezbûre Rahime inkıyâd-ı sâbıkı mu‘terîf olan uzun boylu açık kaşlı gök gözlü Rusiyyü’l-asl kâfirü’l-millet râfi‘u’s-sifr Mihal v. Yovan meclis-i ma‘kūd-ı mezkûrda müteveffâ-yı mezbûrun terekesinden olmak üzere kendüye vaz‘-ı yedi olan mezbûre Rahime Hatun ve İbrahim mahzarlarında üzerine da‘vâ ve takrîr-i kelâm edip müteveffâ-yı mezbûr Ahmed’in yedinde abd-i memlûki olduğum hâlde hayâtında ve kemâl-i akl-i sıhhatinde fevtinden üç ay mukaddem beni huzûr-ı Müslimînde mâlından âzâd ve i‘tâk eyleyip ben sâir harâir-i asliyyât zümresinden olmuşken mezbûrân Rahime Hatun ve İbr[a]him bana müteveffâ-yı mezbûrun terekesinden olmak zu‘muyla bi-gayr-ı hakkın vaz‘-ı yed ederler suâl olunup kasr-ı yedlerine tenbîh ve sebîlim tahliye olunmak matlûbumdur dedikde gıbbe’s-suâl mezbûrân cevâblarında mevsûf-ı mezbûr Mihal’e ber-vech-i muharrer vaz‘-ı yedlerini ikrâr lâkin müteveffâ-yı mezbûrun vech-i mezkûr üzere i‘tâk eylediğini inkâr edicek müdde‘î-i mezbûrdan [62b] müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahmiye-i İstanbul’da Küçük Karaman’da Nakīb Hanı sâkinlerinden Hüseyin Beşe b. Bali ve Hasan Beşe b. İsa nam kimesneler meclis-i ma‘kūd-ı mezkûrda hâzırân olup istişhâd olunduklarında fî’l-hakīka işbu müdde‘î-i mevsûf-ı mezbûr müteveffâ-yı mezbûr Ahmed b. İbrahim hâl-i hayâtında kemâl-i akl-i sıhhatinde fevtinden üç ay mukaddem bizim huzûrumuzda mâlından edâ ve i‘tâk eyledi biz bu husûsa bu vech üzere şâhidleriz şehâdet dahi ederiz deyu her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli Mevlânâ-yı mezbûr mahallinde ketb ü tahrîr ba‘de ma‘an ba‘s olunan Çukadâr Hasan Beşe ve es-Seyyid Mustafa b. Sefer nâm kimesneler ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’r-râbi‘ ve’l-ışrîn min-Zilka‘deti’ş-şerîfe sene 1130 Şuhûdü’l-hâl: İbrahim Ağa b. Mehmed, Ali Çelebi b. Mehmed, Mustafa Efendi b. Ebubekir, Salih Çelebi b. Mehmed, Davud Bey b. Musa, Mahmud Beşe b. Mehmed.