Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 408 Hüküm no: 477 Orijinal metin no: [64b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mosi v. Dehan’ın David v. Abraham’dan alacaklı olduğu Kirüz cemâ‘atinden Mosi v. Dehan nâm Yahudi meclis-i şer‘-i hatîr-i lâzımü’t-tevkīrde Kalavrita cemâ‘atinden David v. Abraham nâm Yahudi muvâcehesinde üzerine da‘vâ ve takrîr-i kelâm edip merkūm David zimmetinde cihet-i karzdan yüz elli kıt‘a esedî guruş hakkım vardır suâl olunup alıverilmesi matlûbumdur dedikde gıbbe’s-suâl merkūm David cevâbında fi’l-vâki‘ müdde‘î-i merkūm Mosi’ye cihet-i mezbûrdan zimmetimde lâzımü’l-edâ ve vâcibü’l-kazâ yüz elli kıt‘a esedî guruş deynim vardır deyû bi tav‘ihî ikrâr etmeğin mûcebince meblağ-ı mezbûr yüz elli esedî guruşu müdde‘î-i merkūm Mosi’ye edâ ve teslîme merkūm David’e tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Muharrem Çavuş b. Abdülmennân mübâşir, Mustafa Çavuş b. Abdullah, Hasan Çelebi b. Ahmed, Baba Resul b. Rıdvan.