Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 233 Hüküm no: 185 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şems-i Pîrî para vakfının mütevellisi Babazâde Mehmed Çelebi’nin, Mustafa oğlu Halil Beşe’nin terekesinden vakıf alacağını talebi Medîne-i hazret-i Ebâ Eyyüb el-Ensârî -aleyhi rahmetü Rabbihi’l-Bârî-’de Câmi‘-i Kebîr mahallesinde sâkine Şems-i Pîrî nam sâhibü’l-hayrın nükūd-ı mevkūfuna bi’l-fi‘il mütevellî olan işbu râfi‘u’l-kitâb Babazâde Mehmed Çelebi b. Mustafa meclis-i şer‘î şerîf-i enverde medîne-i mezbûrda İslam Bey mahallesinde sâkin iken bundan akdem vefât eden Halil Beşe b. Mustafa’nın ba‘de’t-ta‘rîf-i şer‘î zevce-i menkûha-i metrûkesi olup terekesine bi’l-verâse vâzı‘atü’l-yed olan Rabi‘a Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Halil Beşe b. Mustafa b. Abdullah hâl-i hayâtında medîne-i mezbûrede Çavuş Kasım mahallesinde vâki‘ bir tarafdan Kalemtrâşi İbrahim veresesi mülkleri ve bir tarafdan Arpacı Ali Beşe mülkü ve bir tarafdan makābir-i Müslimîn ve bir tarafdan tarîk-ı âm ile mahdûd üç bâb fevkānî oda ve bir bâb tahtânî oda ve bir su kuyusu ve zât-ı eşcâr-ı müsmire ve gayr-ı müsmireyi muhtevî mülk menziline bin yüz yirmi beş senesi Zilhicceti’ş-şerîfesinin on altıncı günü yüz elli guruşa bana bi-tarîk-i istiğlâl bey‘ ve teslîm ben dahi mâl-ı vakf-ı mezbûr ile tarîk-ı merkūm üzere iştirâ ve teslîm ve kabz ve kabûl edip ba‘de menzil-i mahdûd-ı mezkûru gıbbe’t-tahliyyeti’ş-şer‘iyye târîh-i mezbûrdan beher senesi yirmi ikişer buçuk guruşdan üç sene tamâmına değin altmış yedi buçuk guruşun müteveffâ-yı mezbûra icâr ol dahi ber-vech-i muharrer istîcâr edip meblağ-ı mezbûr yüz elli guruş ile icâr-ı merkūm altmış yedi buçuk guruş ki cem‘ân iki yüz on yedi buçuk guruşu kable’l-edâ fevt olmağla suâl olunup müteveffâ-yı merkūmun terekesinden alıverilmek matlûbumdur deyu kelimât-ı meşrûhasına mutâbık vech-i meşrûh üzere bey‘ ve istîcârı nâtık ve târîh-i mezbûrda hilâfeten müvellâ olan Osman Efendi hat ve hatmini müştemil bir kıt‘a hüccet-i şer‘iyye ibrâz edip ve mezbûre Rabi‘a Hatun muvâcehesinde feth ve kırâ’at olundukda mazmûnu min-külli’l-vücûh takrîr-i meşrûhuna muvâfık olmağın merkūme Rabi‘a istintâk olundukda müteveffâ-yı mezbûrun terekesine vaz‘-ı yedini ikrâr ve mazmûn-ı hücceti bi’l-külliye inkâr edicek mütevellî-i mezbûrdan müdde‘âsını mübeyyine beyyine taleb olundukda hüccet-i mezkûrede isimleri mastûr olup udûl-i ahrâr-ı ricâl-i Müslimînden İmâm Abdullah Efendi b. Ahmed ve İbrahim Beşe b. Abdullah nam kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Halil Beşe b. Mustafa b. Abdullah hâl-i hayâtında medîne-i mezbûrda Çavuş Kasım mahallesinde vâki‘ bir tarafdan Kalemtrâşi İbrahim veresesi <> mülkleri ve bir tarafdan Arpacı Ali Beşe <> mülkü ve bir tarafdan makābir-i Müslimîn ve bir tarafdan tarîk-ı âm ile mahdûd üç bâb fevkānî oda ve <> bir bâb tahtânî oda ve bir su kuyusu ve zât-ı eşcâr-ı müsmire ve gayr-ı müsmireyi muhtevî mülk menziline bin yüz yirmi beş senesi Zilhicceti’ş-şerîfesinin on altıncı günü işbu [65a] mütevellî-i mezbûr Mehmed Çelebi yüz elli guruşa bi-tarîki’l-istiğlâl bey‘ ve teslîm ol dahi ber-vech-i muharrer mâl-ı vakf-ı mezbûr ile tarîk-i merkūm üzere iştirâ ve ba‘de’t-tahliyyeti’ş-şer‘iyye ve’t-tekābuzu’l-mer‘î menzil-i mezkûru beher sene yirmi ikişer buçuk guruşdan üç sene tamâmına değin altmış yedi buçuk guruşa merkūm Mehmed Çelebi bizim huzûrumuzda müteveffâ-yı mezbûra icâr ve ol dahi ber-vech-i muharrer istîcâr ve kabz ve kabûl eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’l-hâmis aşer min-Zilhicceti’ş-şerîfe li-sene selasîn ve mi’e ve elf. Şuhûdü’l-hâl: Mehmed Çelebi b. Ali, es-Seyyid İsmail b. ( ), Mustafa Efendi b. Mehmed, Mehmed Efendi b. Talib, Mehmed Efendi b. ( ) , Abdülgani Beşe b. Mustafa ve gayruhüm