Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 235 Hüküm no: 187 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hâc Mustafa b. Hüseyin’in terekesinden zevcesinin mehr-i müeccelinin talebi Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Ebâ Eyyüb el-Ensârî -aleyhi rahmetü Rabbihi’l-Bârî-’de Arakıyyecibaşı mahallesinde sâkin iken bundan akdem vefât eden el-Hâc Mustafa b. Hüseyin’in ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûhası olup zâtı Ali Çelebi b. İsmail ve el-Hâc Mehmed Efendi b. İ[bra]him ta‘rîfe olan işbu râfi‘atü’l-kitâb Zeyneb Hatun bt. Mehmed Ağa meclis-i ma‘kūd-ı mezkûrda meteveffâ-yı mezbûrun sagīr oğlu Mehmed ile ve sulbî sagīre kızı Rukiye’nin tesviye-i emrlerine bâ-hüccet-i şer‘iyye vasiyy-i muhtârı olmağla tereke-i müteveffâ-yı mezbûra bi’l-vesâye vâzı‘u’l-yed olan Mehmed Ağa b. İbrahim mahzarında üzerine da‘vâ ve takrîr-i kelâm edip zevcim müteveffâ-yı mezbûr el-Hâc Mustafa b. Hüseyin b. Mehmed hâl-i hayâtında fevtinden üç sene mukaddem huzûr-ı Müslimînde beni on bin akçe mehr-i müeccel tesmiyesiyle tezevvüc ve kabûl edip akd-i nikâh beynimizde kāim iken meblağ-ı mezbûru kable’l-edâ fevt olmağla tereke-i vâfiyesinden taleb ederim suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘iye mezbûrdan müdde‘âsını mübeyyine beyyine talep olundukda udûl-i ahrâr-ı ricâl-i Müslimînden medîne-i mezbûrede Fethiçelebi mahallesi sâkinlerinden mu‘arrifân-ı mezbûrân Ali Çelebi ve Mehmed Efendi nâm kimesneler li-ecli’ş-şehâde meclis-i ma‘kūd-u mezkûrda hâzırân olup istişhâd olundukda fi’l-hakīka müteveffâ-yı mezbûr el-Hâc Mustafa b. Hüseyin b. Mehmed hâl-i hayâtında fevtinden üç sene mukaddem işbu müdde‘iye-i mezbûru on bin akçe mehr-i müeccel tesmiyesiyle bizim huzûrumuzda zevc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz [deyu] her biri edâ-i şehâdet-i şer‘iyye mûcebiyle ba‘de’l-hükm vâki‘ hâli Mevlânâ-yı mezbûr mahallinde ketb ü tahrîr ba‘de ma‘an irsâl olunan Çukadâr el-Hâc Mustafa b. Mehmed ve es-Seyyid Mustafa b. Sefer Efendi ile meclis-i şer‘a gelip her biri alâ-vukū‘ihi inhâ ve takrîr etmeğin mâ-vaka‘a bi’t-taleb ketbolundu. Fi’l-yevmi’s-sânî ve’l-ışrîn min-Zilhicceti şerîfe li-sene selasîn ve mi’e ve elf Şuhûdü’l-hâl: Mehmed Efendi b. Yusuf el-imâm, Süleyman Efendi b. Mehmed el-müezzin, Yusuf Ağa b. Mustafa, Mehmed Efendi b. Mustafa, Ali Çelebi b. Maksud, el-Hâc İbrahim b. Maksud.