Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 244 Hüküm no: 194 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun bt. Mehmed’in kızına nafaka takdiri Medîne-i hazret-i Ebâ Eyyüb Ensârî -aleyhi rahmetü Rabbihi’l-Bârî- mahallâtından Arakıyyecibaşı mahallesinde sâkine iken bundan akdem vefât eden Fâtıma Hatun bt. Mehmed’in sulbiye sagīre kızı Emetullah’ın tesviye-i umûruna bâ-hüccet-i şer‘iyye vasiyye-i mansûbesi olan işbu râfi‘atü’l-kitâb Hamide Hatun bt. Musa meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vasiyyesi olduğum sagīr-i mezbûrun nafaka ve kisve bahâya eşedd-i ihtiyâcı olmağla vâlidesi müteveffât-ı mezbûrdan müntakil mâlından kadr-i ma‘rûf nafaka ve kisve bahâ farz ve takdîr olunmak bi’l-vesâye matlûbumdur dedikde vasiyye-i mezbûrun kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun vâlidesi müteveffât-ı mezbûreden müntakil mâlından yevmî beş akçe nafaka ve kisve bahâ farz ve takdîr buyurup meblağ-ı mefrûz-ı mezbûru sagīre-i mezbûre Emetullah’ın nafaka ve kisve bahâsına harc ve sarfa lede’l-iktizâ ve istidâneye ve inde’z-zafer mâlına rücû‘a vasiyye-i mezbûre Hamide Hatun’a izin birle mâ-vaka‘a bi’t-taleb ketbolundu. Fi’l-yevmi’s-sâdis ve’l-ışrîn min-Zilhicceti’ş-şerîfe li-sene selasîn ve mi’e ve elf Şuhûdü’l-hâl: Mehmed Efendi b. Yusuf, Süleyman Efendi b. Mehmed, Mustafa Çelebi b. Mehmed, Seyyid Mustafa b. Sefer, Mehmed Çelebi b. İbrahim, Süleyman Çelebi b. Mehmed, el-Hâc Mustafa Çukadâr