Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 244 Hüküm no: 195 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Çelebi b. Mustafa’nın menzil hissesinin çocuklarının ihtiyaçları için satılması Medîne-i hazret-i Ebâ Eyyüb Ensârî -aleyhi rahmetü Rabbihi’l-Bârî-’de Selvi mahallesinde sâkin iken bundan akdem vefât eden Ahmed Çelebi b. Ali Mustafa b. El-Hâc Mehmed’in sulbî sagīr oğulları Süleyman ve Feyzullah ile sulbiye sagīre kızları Havva ve Mü’mine ve Zeyneb’in vâlideleri ve tesviye-i emrlerine kıbel-i şer‘den mansûb vasiyyeleri işbu râfi‘atü’l-kitâb Emine Hatun bt. Şa‘ban meclis-i şer‘-i şerîf-i enverde takrîr-i kelâm ve ta‘bîr ani’l-merâm edip medîne-i mezbûrda vâki‘ Kiremitçi Süleyman evkāfından olup yine Kiremitçi Süleyman mahallesinde inde’l-ahâlî ve ma‘lûmü’l-hudûd ve’l-müştemilât menzilden müteveffâ-yı mezbûrun icâreteyn üzere mutasarrıf olduğu hisse-i erba‘a hissesi intikāl-i âdî ile sagīrûn-ı merkūmûna intikāl edip lâkin hisse-i merkūmenin hâsılı ta‘mîr ve termîmine vefâ etmediğinden gayrı menzil-i mezbûrun rub‘ hissesine mutasarrıfı olan menzil hisse-i mezbûresini bey‘ edip sagīrûn-ı merkūmûnun menzil-i merkūmeden sülüsüne erbâ‘ hisseleri taksîm olunduğu takrîrce dahi kâbil-i intikāl olmayıp ve sagīrûn-ı [68a] merkūmûnun menzil-i merkūmu ta‘mîr edicek âhar mâlları dahi olmadığından gayrı nafaka ve kisve bahâya eşedd-i ihtiyâcları olmağla âhara ferâğ ve bedel-i merkūm istirbâh olunmak sagīrûn-ı merkūmun haklarında her vechile nef‘-i mahfi olmağın yed-i sâile ile dahi âhara ferâğa kıbel-i şer‘-i enverden izin verilmek matlûbumdur dedikde vasiyye-i mezbûre Emine Hatun’un kelimât-ı meşrûhası vâkı‘a mutâbık idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi hisse-i merkūmu ba‘de’l-müzâyede inkıtâ‘u’r-rağbe yed-i sâile ve ma‘rifet-i mütevellî ile âhara ferâğa vasiyye-i mezbûre Emine Hatun’a izin verilip mâ-vaka‘a bi’t-taleb ketbolundu. Fi’l-yevmi’t-tâsi‘ aşer min-Muharremi’l-harâm sene ihdâ ve selasîn ve mi’e ve elf Şuhûdü’l-hâl: İsmail Efendi b. Osman, Ahmed Efendi b. İbrahim, Mustafa Çelebi b. İsmail, diğer Mustafa Çelebi b. Mehmed Efendi, Yusuf b. Mehmed, Abdullah Çelebi b. Mahmud, es-Seyyid Mustafa Çelebi b. Sefer Efendi, es-Seyyid Süleyman b. es-Seyyid Mehmed, Hüseyin Çelebi b. Hasan.