Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 249 Hüküm no: 199 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed Efendi b. Mustafa’ya ait menzilin, kızının vasisi tarafından satılması talebi Medîne-i hazret-i Ebâ Eyyüb Ensârî -aleyhi rahmetü Rabbihi’l-Bârî-’de el-Hâc Hüsrev mahallesinde sâkin iken bundan akdem vefât eden el-Hâc Ahmed Efendi b. Mustafa’nın verâseti zevce-i metrûkesi İsmihan Hatun bt. Mehmed ile sulbiye kızı Ümmü Gülsüm’e münhasıra olduğu şer‘an zâhir ve müte‘ayyin oldukdan sonra sagīr-i mezbûrun tesviye-i umûruna bâ-hüccet-i şer‘iyye vasiyy-i muhtârı olan işbu râfi‘u’l-kitâb Halil Çelebi b. İbrahim meclis-i şer‘-i enverde takrîr-i kelâm ve ta‘bîr ani’l-merâm edip vasîsi olduğum sagīre-i mezbûrenin nafaka ve kisve bahâya dahi eşedd-i ihtiyâcı olup mahalle-i mezbûrda vâki‘ bir tarafdan sagīr-i mezbûrenin meşrûtası ve vakf-ı menzil ve bir tarafdan Halil Çelebi mülkü ve bir tarafdan el-Hâc Mustafa mülkü ve bir tarafdan tarîk-ı âm ile mahdûd iki bâb fevkānî oda ve iki dehlîz ve bir matbah ve bir gasilhâne ve tahtında bir mekteb odası ve bir <> kepenk bakkal dükkânı ve bir mahzen ve bahçeyi muhtevî mülk menzilin bey‘i lâzım gelmeğin ba‘de’l-müzâyede semen-i misliyle âhara bey‘ine izin taleb ederim dedikde vasiyy-i mezbûrun kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi menzil-i mezbûru ba‘de’l-müzâyede semen-i misliyle âhara bey‘a vasiyy-i mezbûr Halil Çelebi’ye izin vermeğin mâ-vaka‘a bi’t-taleb ketbolundu Fi’l-yevmi’l-ışrîn min-Zilhicceti’ş-şerîfe li-sene selasîn ve mi’e ve elf Şuhûdü’l-hâl: el-Hâc Mehmed Efendi b. İbrahim, Süleyman Efendi b. Mustafa, Mehmed Efendi b. Ali, es-Seyyid Hasan [b.] es-Seyyid Ali, İsmail Çelebi el-müezzin, Ahmed Bey b. Osman, el-Hâc İsmail b. Hasan, Ahmed Ağa b. el-Hâc Ali, el-Hâc Mustafa b. Ali ve gayruhüm.