Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 250 Hüküm no: 200 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed Efendi b. Mustafa’nın kızına nafaka takdiri Medîne-i hazret-i Ebâ Eyyüb Ensârî -aleyhi rahmetü Rabbihi’l-Bârî-’de el-Hâc Hüsrev mahallesinde sâkin iken bundan akdem vefât eden el-Hâc Ahmed Efendi b. Mustafa’nın sulbiye kızı Ümmü Gülsüm’ün vâlidesi işbu râfi‘atü’l-kitâb İsmihan Hatun bt. Mehmed meclis-i şer‘-i şerîf-i enverde takrîr-i kelâm ve ta‘bîr ani’l-merâm edip kızım sagīr-i mezbûrenin nafaka ve kisve bahâya eşedd-i ihtiyâcı olmağla babası müteveffâ-yı mezbûrdan müntakil kadr-i ma‘rûf nafaka ve kisve bahâ farz ve takdîr olunmak matlûbumdur dedikde mezbûre İsmihan Hatun’un kelimât-ı meşrûhası vâkı‘a mutâbık idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrenin babası müteveffâ-yı mezbûrdan müntakil mâlından beher yevm ikişer pâre nafaka ve kisve bahâ [far]z ve takdîr buyurup ve meblağ-ı mefrûz-ı mezbûru sagīre-i mezbûre Ümmü Gülsüm’ün nafaka ve kisve bahâsına harc ve sarfa lede’l-iktizâ ve istidâneye ve inde’z-zafer mâlından rücû‘a vasiyye-i mezbûre İsmihan Hatun’a izin vermeğin mâ-vaka‘a bi’t-taleb ketbolundu. Fi’l-yevmi’l-hâdî ve’l-ışrîn min-Muharrremi’l-harâm sene 1131 Şuhûdü’l-hâl: El-Hâc Mehmed Efendi b. İbrahim, Süleyman Efendi b. Mustafa, el-Hâc Mustafa Ağa b. Abdullah, el-Hâc Ali b. Selim, Mehmed Efendi b. Ali, Ahmed Bey b. Osman, İbrahim Çelebi b. Mustafa, Ahmed Ağa b. el-Hâc Ali, es-Seyyid Hasan b. es-Seyyid Ali, es-Seyyid Mustafa b. Sefer Efendi, es-Seyyid Süleyman b. es-Seyyid Mehmed ve gayruhüm.