Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 250 Hüküm no: 201 Orijinal metin no: [69b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep Hatun bt. Abdullah’ın çocuklarına nafaka tayini Medîne-i hazret-i Ebâ Eyyüb Ensârî -aleyhi rahmetü Rabbihi’l-Bârî-’de Zeyneb Hatun mahallesinde sâkine iken bundan akdem vefât eden Zeyneb Hatun bt. Abdullah’ın verâseti sadrî sagīr oğulları Mustafa ve Mehmed’in velîleri ve babaları işbu râfi‘u’l-kitâb Halil Çelebi b. Mustafa nâm kimesne meclis-i şer‘-i şerîf-i enverde bi’l-velâye takrîr-i kelâm ve ta‘bîr ani’l-merâm edip velîleri olduğum sagīrân-ı mezbûrânın nafaka ve kisve bahâya eşedd-i ihtiyâcları olmağla vâlideleri müteveffât-ı mezbûreden müntakil mâllarından her birine nafaka ve kisve bahâ farz ve takdîr olunmak matlûbumdur dedikde mezbûr Halil Çelebi’nin kelimât-ı meşrûhası vâkı‘a mutâbık idiği zeyl-i vesîkada muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīrân-ı mezbûrânın vâlideleri müteveffât-ı mezbûrdan müntakil mâllarından yevmî üçer akçe nafaka ve kisve [70a] bahâ farz ve takdîr buyurup meblağ-ı mefrûzu ve lede’l-iktizâ ve istidâneye ve inde’z-zafer mâllarına rücû‘a babaları mezbûr Halil Çelebi’ye izin verilmekle mâ-vaka‘a bi’t-taleb ketbolundu Fi’l-yevmi’l-hâmis aşer min-Saferi’l-hayr li-sene ihdâ ve selasîn ve mi’e ve elf Şuhûdü’l-hâl: Ebubekir Çelebi b. Ali, Mehmed Ağa b. Abdülkadir, Osman Çelebi b. el-Hâc Mustafa, Derviş Mehmed b. Mustafa, Ömer Ağa b. el-Hâc Mustafa, Veli Efendi