Eyüp Mahkemesi 138 Numaralı Sicil (H. 1129-1131 / M. 1717-1718) cilt: 61, sayfa: 251 Hüküm no: 202 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed Ağa b. Mustafa’nın terekesinden zevcesinin mehr-i müeccelini talebi Medîne-i hazret-i Ebâ Eyyüb el-Ensârî -radıye anhu Rabbühü’l-Bârî-’de el-Hâc Hüsrev mahallesinde sâkin iken bundan akdem vefât eden el-Hâc Ahmed Efendi b. Mustafa b. Abdullah’ın zevce-i menkûha-i metrûkesi olup zâtı el-Hâc Mehmed Efendi b. İbrahim ve Mehmed Ağa b. Ali ta‘rîfleriyle mu‘arrefe olan işbu râfi‘atü’l-kitâb İsmihan Hatun bt. Mehmed meclis-i şer‘-i şerîf-i enverde müteveffâ-yı mezbûr el-Hâc Ahmed Efendi’nin sulbiye kızı Ümmü Gülsüm’ün tesviye-i umûruna bâ-hüccet-i şer‘iyye vasiyy-i muhtârı olan Halil Çelebi b. İbrahim mahzarında üzerine da‘vâ ve takrîr-i kelâm edip zevcim müteveffâ-yı mezbûr el-Hâc Ahmed Efendi b. Mustafa tezevvüc murâd ettikde târîh-i kitâbdan o[n a]ltı sene mukaddem üç bin mehr-i müeccel tesmiyesiyle huzûr-ı Müslimînde beni tezevvüc ve kabûl edip ve akd-i nikâh kāim iken meblağ-ı mezbûru kable’l-edâ fevt olmağla hâlâ terekesinden taleb ederim su’âl olunup alıverilmesi matlûbumdur dedikde gıbbe’s-suâl vasiyy-i mezbûr Halil Çelebi cevâbında tereke-i müteveffâ-yı mezbûre bi’l-vesâye vaz‘-ı yedini ikrâr lâkin müdde‘iye-i mezbûrenin müdde‘âsını inkâr edicek müdde‘iye-i mezbûre İsmihan Hatun’da n müdde‘âsına mutâbıka beyyine taleb olundukda udûl-i ahrâr-ı ricâl-i Müslimînden mahmiye-i İstanbul’da Eğrikapı dâhilinde el-Hâc İlyas mahallesi sâkinlerinden müte‘arrifân-ı mezbûrân el-Hâc Mehmed Efendi ve Mehmed Ağa nâm kimesneler li-ecli’ş-şehâde meclis-i şer‘a hâzırân olup istişhâd olundukda fi’l-hakīka müteveffâ-yı mezbûr el-Hâc Ahmed Efendi b. Mustafa b. Abdullah tezevvüc murâd ettikde târîh-i kitâbdan on altı sene mukaddem üç bin akçe mehr-i müeccel tesmiyesiyle bizim huzûrumuzda işbu müdde‘iye-i mezbûre İsmihan Hatun’u tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketbolundu. Fi’l-yevmi’s-sânî ve’l-ışrîn min-Muhârremi’l-harâm li-sene ihdâ ve selasîn ve mi’e ve elf Şuhûdü’l-hâl: Süleyman Efendi b. Mustafa, el-Hâc Muslu Ağa b. Selim, Mehmed Efendi b. Ali, el-Hâc İsmail b. Mustafa, Halil Çelebi b. Mustafa, es-Seyyid Mustafa b. Sefer Efendi