Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 51 Hüküm no: 13 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun bt. Musa’nın küçük oğlu Süleyman’a nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Kiremidci Süleyman mahallesinde sâkine iken bundan akdem vefât eden Ümmühani Hatun bt. Musa’nın sadrî sagīr oğlu Süleyman’ın babası ve tesviye-i umûruna vasîsi olan işbu râfi‘u’l-kitâb Mustafa Bey b. Receb meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîsi olduğum sagīr-i mezbûrun nafaka ve kisve-bahâya eşedd-i ihtiyâcı olmağla vâlidesi müteveffât-ı mezbûreden müntakıl mâlından kadr-ı ma‘rûf nafaka ve kisve-bahâ farz ve takdîr buyurulmak matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīr-i mezbûrun vâlidesi müteveffât-ı mezbûreden müntakıl mâlından yevmî ikişer para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve-bahâsına harc ve sarfa ve lede’l-iktizâ istidâneye ve inde’z-zafer mâlına rücû‘a vasîyy-i mezbûra izin vermeğin mâ-vaka‘a bi’t-taleb ketb olundu. Fî 17 min-Cumâdelâhire sene 1147. Şuhûdü’l-hâl: Eş-şâhidûnü’s-sâbıkūn.