Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 58 Hüküm no: 20 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Mustafa’nın, kölesi Ali b. Abdullah’ı henüz hayatta iken azat ettiği ve varislerinin adı geçen köle ile herhangi bir alakalarının bulunmadığı Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Arakıyecibaşı mahallesinde sâkin iken bundan [akdem] vefât eden Mehmed Beşe b. Mustafa’nın verâseti zevce-i menkûha-i metrûkesi Emine bt. Abdullah ile li-ebeveyn karındaşı Mustafa Çelebi’ye münhasıra olduğu şer‘an zâhir ve müte‘ayyin oldukdan sonra mezbûre Emine tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iye ile ârifân Abdullah Çelebi b. ( ) ve Molla Mustafa b. ( ) şehâdetleriyle sâbit ve sübût-i vekâletine hükm-i şer‘î lâhıka olan Mehmed Efendi b. Abdullah ile karındaşı mezbûr Mustafa Çelebi mahfil-i şer‘-i enverde müteveffâ-yı mezbûrun mu‘takı işbu orta boylu, kara kaşlı, kara gözlü, Acemiyyü’l-asl, Müslimü’l-mille, bâ‘isü hâze’l-kitâb Ali b. Abdullah mahzarında her biri bi’l-vekâle ve bi’l-verâse ikrâr ve takrîr-i kelâm edüp işbu mevsûf-ı mezbûr Ali müteveffâ-yı mezbûrun abd-i memlûkü olduğu hâlde hâl-i hayatında ve kemâl-i akıl [ve] sıhhatinde fevtinden bir sene mukaddem mâlından âzad ve mülkünden ihrâc ve kayd-ı rıkdan [ıtlâk] edüp mevsûf-ı mezbûr Ali sâir ahrâr-ı asliyyîn gibi hür olmuşdur; bizim mezbûr Ali’de kat‘a alâka ve medhalimiz yokdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis-aşer min-Cumâdelâhire sene 1147. Şuhûdü’l-hâl: Ali Bey b., Mustafa Efendi b. Hüseyin, es-Seyyid Mehmed b. es-Seyyid Mustafa, Ahmed Efendi b. Mustafa, el-Hâc Abdullah b. Yusuf.