Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 65 Hüküm no: 27 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Ali’nin küçük oğlu Ahmed’e vasî tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Davudağa mahallesinde sâkine iken bundan akdem vefât eden Âişe Hatun bt. Ali’nin sadrî sagīr oğlu Ahmed’in tesviye-i umûruna kıbel-i şer‘den bir vasî nasbı lâzım ve mühim olmağın sagīr-i mezbûrun babası olup babası mahmûdü’l-hâl idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfi‘u’l-kitâb Osman Çelebi b. Mahmud’u hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīr-i mezbûrun tesviye-i umûruna vasî nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Recebi’l-mürecceb li-seneti seb‘a ve erba‘în ve miete ve elf. Şuhûdü’l-hâl: Fahrü’l-müderrisîni’l-kirâm es-Seyyid Mehmed Sa[î]d Efendi, fahrü’l-kuzât es-Seyyid Süleyman Efendi b. Mehmed, Ahmed Efendi b. Ali, Hasan Çelebi b. Abdullah, İsmail Beşe b. el-Hâc Mustafa.