Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 410 Hüküm no: 482 Orijinal metin no: [65a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani bt. İbrahim Ağa’nın evlendiği İbrahim Ağa’nın kendisinden başka karısı ve odalığı olduğu gerekçesiyle açtığı boşanma davasında iddiasını ispat edemediği Mahrûse-i Üsküdar’da Davud Paşa mahallesi sâkinelerinden Ümmühâni bt. İbrahim Ağa nâm hâtun meclis-i şer‘-i şerîfde bâ‘isü’l-kitâb İbrahim Ağa b. Abdülvehhâb nâm kimesne mahzarında üzerine da‘vâ ve takrîr-i kelâm edip yüz elli guruş mehr-i mu‘accele ve elli beş bin akçe mehr-i müeccele ile mezbûr İbrahim Ağa’ya inkâh ve tezvîce vekîlim olan ( ) nâm kimesne mehreyn-i mezbûreyn ile beni mezbûr İbrahim Ağa’ya vekâleten tezvîc ve inkâh ettikden sonra mezbûr İbrahim Ağa’nın âhar zevcesi ve odalığı olmağla mezbûr İbrahim Ağa’dan kable’l-halve ictinâb ettiğimde mezbûr İbrahim Ağa benden niçin kaçınırsız zevcem Ümmühâni’den gayrı avratım ya odalığım var ise mezbûre Ümmühâni’nin irâdeti altında olsun her nice isterse öyle eylesin deyû bana haber gönderip ben dahi vâkıfa olduğum meclisde bâyinen nefsimi ihtiyâr etmişidim, suâl olunup mehreyn-i mezbûreyni nısfı mezbûr İbrahim Ağa’dan alıverilmesi matlûbumdur dedikde, gıbbe’s-suâl mezbûr İbrahim Ağa cevâbında müdde‘iyye-i mezbûreyi mehreyn-i mezbûreyn ile tezevvüc ettiğimden sonra mezbûre Ümmühâni’den gayrı eğer avratım veya odalığım var ise mezbûre Ümmühâni’nin irâdeti altında olsun demişdim, lâkin mezbûre Ümmühâni’den gayrı avratım veya odalığım yokdur deyicek müdde‘iyye-i mezbûreden kendiden gayrı merkūm İbrahim Ağa’nın avratı veya odalığı olduğuna beyyine taleb olundukda ityân-ı beyyineden izhâr-ı acz ile istihlâf etmeğin merkūm İbrahim Ağa’ya vech-i şer‘î üzre yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘iyye-i mezbûre bilâ-beyyine vech-i muharrer üzre mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, Hasan Beşe b. Abdullah Çukadâr, Hasan Çelebi b. Ahmed, Mustafa Çelebi b. Hacı Ahmed, İbrahim Çelebi b. Mehmed.