Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 411 Hüküm no: 483 Orijinal metin no: [65a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma’nın ölen babasından kalan tereke hissesini kardeşi Mehmed Beşe’den aldığı Vilâyet-i Anadolu’da kasaba-i Biga’da bundan akdem vefât eden Hasan b. Güllü nâm kimesnenin verâseti sulbiye kebîre kızı Fâtıma ile li ebeveyn karındaşı Mehmed Beşe nâm kimesneye münhasıra olduğu şer‘an zâhir ve mütehakkik oldukdan sonra mezbûre Fâtıma’nın zevci ve tarafından husûs-ı âtîye vekîl olduğu mezbûrenin zâtını ma‘rifet-i şer‘iyye ile ârifân olan Süleyman b. Yusuf ve Mehmed b. Mahmud nâm kimesneler şehâdetleri ile şer‘an sâbit olan Receb b. Yusuf nâm kimesne meclis-i şer‘-i hatîrde müteveffâ-yı mezbûrun muhallefâtına vâzı‘ü’l-yed olan merkūm Mehmed Beşe mahzarında bi’l-vekâle ikrâr ve takrîr-i kelâm edip müteveffâ-yı mezbûr Hasan’ın merkūm Mehmed Beşe yedinde olan sekiz bin sekiz yüz akçe muhallefâtından zevcem müvekkile-i mezbûrenin nısf hissesine isâbet eden dört bin dört yüz akçeyi hâlâ merkūm Mehmed Beşe yedinden bi’l-vekâle ahz u kabz eyledim meblağ-ı mezbûrdan merkūm Mehmed Beşe yedinde bir akçe ve bir habbe kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Kağıdçı Süleyman Bey b. ( ), Hacı Hüseyin, Ahmed Efendi b. Süleyman, Hasan Beşe b. Mustafa, Hamid Efendi Kaşıkçı, Mehmed Çelebi b. Abdullah, İbrahim Çelebi b. Mehmed.