Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 411 Hüküm no: 484 Orijinal metin no: [65a-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Mehmed’in Acem metâı bahasından Mehmed b. Osman’dan alacaklı olduğu Tüccâr tâifesinden Cafer b. Mehmed meclis-i şer‘-i şerîf-i lâzımü’t-teşrîfde Mehmed b. Osman nâm kimesne mahzarında üzerine da‘vâ ve takrîr-i kelâm edip mezbûr Mehmed zimmetinde yedimden müşterâ ve makbûz beynimizde ma‘lûm Acem metâ‘ı bahâsından yüz altı tamâm ve üç rub‘ esedî guruş hakkım olup bundan akdem mezbûr Mehmed deyn-i mezbûrun kırk beş esedî guruşu bana edâ edip bâkī zimmetinde kalıp hattâ mezbûr Mehmed meblağ-ı bâkī altmış bir esedî guruş zimmetinde bana deyni olduğunu târih-i kitâbdan on gün mukaddem ikrâr dahi etmiş idi, suâl olunup meblağ-ı bâkī-i mezbûrun mezbûr Mehmed’den alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i İstanbul’da Vezir hanı’nda sâkin Ali b. İbrahim ve Ahmed b. Allahverdi nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka merkūm Mehmed târih-i kitâbdan on gün mukaddem bizim huzûrumuzda müdde‘î-i mezbûr Cafer yedinden müşterâ ve makbûz beynlerinde ma‘lûm Acem metâ‘ı bahâsından elli beş buçuk esedî guruş deynim vardır deyû mukaddemâ bizim huzûrumuzda ikrâr ve bizi işhâd eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra mûcebince elli beş buçuk esedî guruşu müdde‘î-i mezbûr edâya merkūm Mehmed’e tenbîh olundukdan sonra müdde‘î-i mezbûrdan ziyâde da‘vâsı için beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunmağın mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Şükrullah b. Mustafa, Baba Resul b. Rıdvan, Mehmed Beşe b. Ramazan, Mehmed b. Ali.