Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 85 Hüküm no: 47 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Rukiye Hatun bt. Ali’nin, arsasını kardeşi Seyyid Abdülkerim b. Mustafa’ya sattığı Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Davudağa mahallesinde sâkine olup zâtı ta‘rîf-i şer‘î ile mu‘arrefe olan Şerîfe Rukiye Hatun bt. Ali meclis-i şer‘-i şerîf-i enverde karındaşı işbu râfi‘u’l-kitâb es-Seyyid Abdülkerim b. Mustafa mahzarında üzerine da‘vâ ve takrîr-i kelâm edüp yedimde mülk ve hakkım olup mahalle-i mezbûrede vâki‘ bir tarafdan Attar Mehmed Çelebi mülkü ve bir tarafdan benim âhar mülküm ve bir tarafdan Kurşuncu Ahmed menzili ve bir tarafdan tarîk-ı âm ile mahdûd tûlen yirmi yedi zirâ‘en ve arzen sekiz zirâ‘, be-hesâb-ı terbî‘î iki yüz <> on altı zirâ‘ arsa-i hâliye ve bir su kuyusunu tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile karındaşım mezbûr es-Seyyid Abdülkerim’e elli dört buçuk guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr elli dört buçuk guruşu mezbûr es-Seyyid Abdülkerim yedinden bi’t-tamam ve’l-kemâl ahz u kabz edüp ba‘de’l-yevm arsa-i mahdûd-ı mezkûr karındaşım mezbûr es-Seyyid Abdülkerim’in mülk-i müşterâsı ve hakk-ı sırfı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis-aşer min-Şa‘bâni’l-mu‘azzam li-seneti seb‘a ve erba‘în ve miete ve elf. Şuhûdü’l-hâl: Eş-şeyh Abdullah Efendi b. eş-Şeyh Mahmud, es-Seyyid Mehmed Çelebi b. es-Seyyid Mustafa, Ahmed Efendi b. Mustafa, es-Seyyid Ahmed Çelebi b. es-Seyyid Mehmed, Mehmed Beşe Çömlekci, Mustafa Efendi b. Hasan el-müezzin, Hasan Çelebi b. Ali.