Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 86 Hüküm no: 48 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Rüstem Ağa’nın reşit olan oğlu Mehmed Emin’in, küçüklüğünde vasîsi olan dedesi Çakırcıbaşı Rüstem Ağa b. Abdullah’ın zimmetini, 11 yıllık vasîlik dönemine ait hesaplardan ibra ettiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Takyecibaşı mahallesinde sâkin iken bundan akdem vefât eden Ahmed Ağa b. Rüstem Ağa’nın sulbî sagīr oğlu Mehmed Emin nâm bâliği[n] bulûğuna rüşdü munzam olduğunu Halil Ağa b. Mustafa ve Yakub Ağa b. Mehmed ve Osman Ağa b. Hüseyin alâ-tarîkı’ş-şehâde ba‘de’l-ihbâr meclis-i şer‘-i şerîf-i enverde ceddi ve hâl-i sıgārında vasîyy-i muhtârı olan Ser-çakırcıyân-ı hâssa fahrü’l-emâcid ve’l-ekâbir işbu râfi‘u’l-kitâb Rüstem Ağa b. Abdullah tarafından husûs-ı âti’l-beyânda vekîl-i sâbitü’l-vekâlesi Hüseyin Ağa b. Mehmed mahzarında ikrâr ve takrîr-i kelâm edüp ceddim müvekkil-i müşârün-ileyh Rüstem Ağa benim hâl-i sıgārımda vasîyy-i muhtârım olmağla bin yüz otuz altı senesi Recebi’l-müreccebi gurresinden bin yüz kırk yedi senesi Recebi’l-mürecceb[i] gurresine gelince bâ-berât-ı âlî-şân mutasarrıf olduğum tımarım mâlından on bir senede bir yük doksan iki bin sekiz yüz akçe müvekkil-i müşârün-ileyh kabz edüp meblağ-ı mezbûrun bâ-hüccet-i şer‘iye doksan iki bin sekiz yüz akçesi nafaka ve kisveme ve yetmiş dokuz bin iki yüz akçesini dahi bâ-fermân-ı âlî tımar-ı mezbûrun cebeliyesi içün ve yedi bin iki yüz akçe dahi hitânıma ve beş bin dört yüz akçe dahi sâir masârif-i lâzımem içün harc ü sarf edüp el-hâletü hâzihî müvekkil-i müşârün-ileyh Rüstem Ağa ile beynimizde hesâbımız görülüp meblağ-ı mezbûrdan ancak zimmetinde yirmi üç bin dört yüz akçe bâkī kalmağla meblağ-ı mezbûru müvekkil-i müşârün-ileyh Rüstem Ağa bana def‘ ve teslîm ben dahi ber-vech-i muharrer meblağ-ı mezbûru yedinden bi’t-tamam ve’l-kemâl alıp kabz edüp meblağ-ı bâkī-i mezkûr yirmi üç bin dört yüz akçeden müvekkil-i müşârün-ileyh yedinde ve zimmetinde bir akçe ve bir habbe bâkī kalmayıp ba‘de’l-yevm meblağ-ı mezbûr bir yük doksan iki bin sekiz yüz akçeden makbûz [17b] ve masrûfuna müte‘allika âmme-i de‘âvî ve mutâlebât ve eymân ve muhâsamâtdan ceddim müvekkil-i müşârün-ileyh Rüstem Ağa’nın zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Şa‘bâni’l-mu‘azzam li-sene 1147. Şuhûdü’l-hâl: Mustafa Ağa b. İbrahim, es-Seyyid eş-Şeyh Mehmed Efendi b. İsmail, Halil Ağa b. Mustafa, Berber Mustafa Çelebi b. Hasan, Mustafa Efendi b. Kasım, es-Seyyid Mehmed b. es-Seyyid Abdullah, Mehmed Ağa b. Ahmed, Hüseyin Çelebi b. Mehmed, İbrahim Çelebi b. Ömer, Abdullah Çelebi b. ve gayruhum mine’l-huzzâr.