Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 412 Hüküm no: 485 Orijinal metin no: [65a-8] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Ali’nin, Mehmed’e sattığı ipliğin bedelini kefil Abdurrahman b. Hüseyin’den istediği Mahmiye-i İstanbul’da Çinili hamam kurbunda sâkin Yusuf b. Ali nâm kimesne meclis-i şer‘-i hatîr-i lâzımü’t-tevkīrde Abdurrahman b. Hüseyin nâm kimesne mahzarında üzerine da‘vâ ve takrîr-i kelâm edip semeni işbu târih-i kitâb senesi Saferi’nin yirmi altıncı gününden yüz elli gün tamâmına değin müeccel gāib ani’l-meclis Mehmed nâm kimesneye her vakıyyesi seksen akçeden kırk vakıyyesine ipliği üç bin iki yüz akçeye bey‘ ve teslîm ol dahi iştirâ ve kabz ettikden sonra semen-i mezbûr üç bin iki yüz akçeyi merkūm Abdurrahman emr ve kabûlü hâviye kefâlet-i sahîha-i şer‘iyye ile kefîl olmuşidi, hâlâ ecl-i merkūm tamâm olmağın meblağ-ı mezbûru merkūm Abdurrahman’dan kefâletine binâen taleb ederim suâl olunsun dedikde gıbbe’s-suâl merkūm Abdurrahman cevâbında fi’l-hakīka semen-i mezbûra vech-i muharrer üzre kefîl olduğunu ikrâr lâkin zikr olunan ipliği müdde‘î-i merkūm mezbûr Mehmed’e târih-i kitâb Rebî‘ulevveli’nin dördüncü gününden yüz elli gün tamâmına değin te’cîl etmişidi, ecel-i merkūm dahi tamâm olmamışdır deyicek, müdde‘î-i merkūmdan müdde‘âsını mübeyyine beyyine taleb olundukda [65b] udûl-i ricâlden olup mahmiye-i mezbûrede Manisalı Çelebi mahallesi sükkânından Hüseyin Beşe b. Abdullah ve Hasan b. Kasım nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Yusuf zikr olunan penbe ipliği merkūm Mehmed’e işbu târih-i kitâb senesi Saferi’nin yirmi altıncı gününde bey‘ ve teslîm eyledikde merkūm Abdurrahman dahi bizim huzûrumuzda semenine kefîl olmağın ecel-i merkūm tamâm olmuşdur, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Recebi’l-mürecceb li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Ahmed b. Hasan, İbrahim Çelebi b. Ahmed, Baba Resul b. Rıdvan.