Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 413 Hüküm no: 486 Orijinal metin no: [65b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülistan bt. Abdullah’ın, Gevher bt. İlyas’a kendi evini veya çiftliğini satıp bedelini bu parayla ödemesi şartıyla sattığı evin satışının geçersiz olduğu Mahmiye-i İstanbul’da Akbıyık mahallesi sâkinelerinden Gülistan bt. Abdullah nâm hâtun meclis-i şer‘-i şerîfde bâ‘isetü’l-kitâb Gevher bt. İlyas nâm hâtun mahzarında üzerine da‘vâ ve takrîr-i kelâm edip mahalle-i mezbûrede Hoca Kasım Gönânî mahallesinde vâki‘ bir tarafdan Kuloğlanı İbrahim menzili ve bir tarafdan Şaban nâm kimesne mülkü ve iki tarafdan tarîk-i âm ile mahdûd büyût-ı adîdeyi müştemil mülk menzili târih-i kitâb senesi şehr-i Rebî‘ulevveli’nin yirmi beşinci günü mezbûre Gevher’e otuz bir bin akçeye bey‘ ve teslîm ol dahi iştirâ ve tesellüm etmişidi, suâl olunup semen-i mezbûrun mezbûre Gevher’den alıverilmesi matlûbumdur dedikde gıbbe’s-suâl mezbûre Gevher cevâbında müdde‘î-i mezbûr menzil-i mahdûd-ı mezbûrunu târih-i mezbûrda ba‘dehû kendi menzili yâ çiftliği bey‘ edebilirsem semenini anların semeninden verip bey‘ edemezsem kaç gün oturursam yevmî altışar akçe ücretini vermek şartı ile bana bey‘ ve teslîm edip ben dahi şart-ı mezkûr ile iştirâ ve tesellüm etmiş idim şart-ı mezkûra binâen bey‘-i mezbûr sahîh değildir deyicek gıbbe’s-suâl ve’l-inkâr mezbûre Gevher’den bey‘-i mezbûr şart-ı mersûm ile olduğuna beyyine taleb olundukda zikr olunan Hoca Kasım Gönânî mahallesi sükkânından Mehmed Beşe b. Hasan ve Ömer b. Ali nâm kimesneler li ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka müdde‘iyye-i mezbûre Gülistan menzil-i mahdûd-ı mezbûru bizim huzûrumuzda târih-i mezbûrda mezbûre Gevher kendi menzilini yâhud çiftliğini bey‘ edebilir ise semeni anların semeninden verip bey‘ edemez ise sâkine olduğu eyyâmda yevmî altışar akçe ücretini vermek şartıyla mezbûre Gevher’e semen-i mezkûra bey‘ ve teslîm edip mezbûre Gevher dahi şart-ı mezkûr ile iştirâ ve tesellüm etmiş idi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince şart-ı mezkûresiyle bey‘-i mezbûr sahîh olmamağın müdde‘iyye-i mezbûre vech-i muharrer üzre semen da‘vâsı için mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’t-tâsi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed b. Abdullah, Şükrullah b. Mustafa, Baba Resul b. Rıdvan, İbrahim b. Ahmed, Hasan Çelebi b. Ahmed.