Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 106 Hüküm no: 66 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın eşi Hatice ile kız kardeşi Hatice arasında ortaya çıkan miras anlaşmazlığının sulh ve ibra ile sonuçlandığı Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ceze[r]î Kasım Paşa mahallesinde <> vâki‘ Mehmed Ağa’nın sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde medîne-i mezbûrede Ali Paşa-yı Cedîd mahallesinde sâkin iken bundan akdem vefât eden el-Hâc Mustafa b. Abdullah’ın verâseti zevce-i menkûha-i metrûkesi Hadîce Hatun bt. Mustafa ile li-ebeveyn kız karındaşı diğer Hadîce Hatun’a münhasıra <> ve tashîh-i mes’elesi dört sehimden i‘tibâr olunup sihâm-ı mezbûreden bir sehmi zevcesi mezbûre Hadîce Hatun’a ve bâkī üç sehmi kız karındaşı diğer Hadîce Hatun’a isâbeti tahakkukundan sonra zâtı Mehmed b. Ahmed ve Salih Çelebi [b.] Mehmed ta‘rîfleriyle mu‘arrefe olan müteveffâ-yı mezbûrun [kız karındaşı Hadîce Hatun, müteveffâ-yı mezbûrun] zevcesi mezbûre Hadîce Hatun’un karındaşı ve tarafından husûs-ı âti’l-beyânda vekîl-i müsecceli Ebûbekir b. Mustafa mahzarında ikrâr ve takrîr-i kelâm edüp, karındaşım müteveffâ-yı mezbûr el-Hâc Mustafa’nın defter-i kassâmdan hâric mecmû‘u üç yüz guruş kıymetli üç çift kadife yastık ve beş şilte ve bir ocak yaşmağı ve üç Yanbolu kebesi ve yedi beledî döşek ve üç yemenî yorgan ve altı yemenî mak‘ad ve iki beyaz ihrâm ve bir kaliçe seccâde ve üç hoşâb tası ve üç mertabânî? tabak? ve üç tencere ve on sahan ve bir şam‘dân ve bir güğüm ve bir âbdest leğeni ve bir çift üzengi ve bir leğen ma‘a ibrik ve bir Bosna tası ve bir mangal ve bir kahve ibriği ve üç parça evrenşâhî ve iki pastav çuka ve bir kuru lengerî ve dört Şam alacası ve bir câriye ile nakid üç yüz guruşu müvekkile-i mezbûre Hadîce Hatun ketm ve ihfâ eyledi deyü da‘vâ sadedinde olduğumda vekîl-i mezbûr dahi müvekkile-i mezbûrenin zevci müteveffâ-yı mezbûr el-Hâc Mustafa zimmetinde mecmû‘u yüz yirmi guruş kıymetli bir çift zümrüt küpe ve bir kakum kürk ile ve altmış İstanbul zencîrlisi altın hakkı vardır deyü da‘vâ eylediğinde beynimizde münâza‘ât-ı kesîre ve muhâsamât-ı şedîde vâkı‘a olmuşdu; el-hâletü hâzihî beynimiz[e] muslihûn tavassut edüp beni müvekkile-i mezbûre Hadîce Hatun ile altmış guruş üzerine sulh eylediklerinde ben dahi ber-vech-i muharrer sulh-ı mezbûru ba‘de’l-kabûl ve bedel-i sulh olan meblağ-ı mezbûr altmış guruşu vekîli mezbûr Ebûbekir Çelebi yedinden bi’t-tamam ve’l-kemâl ahz u kabz edüp ba‘de’l-yevm zikr[i] mürûr eden eşyâ ve câriye ve üç yüz guruşdan ve sâir karındaşım müteveffâ-yı mezbûrun terekesine müte‘allika âmme-i miras da‘vâsından zevcesi müvekkile-i mezbûre Hadîce Hatun’un zimmetini ibrâ ve ıskāt eylediğimde ol dahi kezâlik medfû‘u olan altmış guruş ile mârrü’z-zikr zümrüt küpe ve kakum kürk kıymetli yüz yirmi guruş ile altmış [İstanbul] zencîrlisi altını ve sâir terekeye müte‘allika âmme-i da‘vâdan benim zimmetimi ibrâ ve ıskāt edüp vechen mine’l-vücûh ve sebeben mine’l-esbâb birbirimiz ile da‘vâ ve nizâ‘ımız olmayıp her birimiz âharın zimmetlerini ibrâ ve ıskāt eyledik ve müteveffâ-yı mezbûrun mirasına müte‘allik eğer benden ve müvekkile-i mezbûreden da‘vâ ve nizâ‘ımız zuhûr ederse lede’l-hükkâmi’l-kirâm mesmû‘a olunmasın dediklerinde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Yusuf b. Abdullah ve Muhzır es-Seyyid Mehmed <> b. es-Seyyid Mustafa ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 13 min-Şevvali’l-mükerrem sene 1147. Şuhûdü’l-hâl: Fahrü’l-kuzât es-Seyyid Yusuf Efendi b. es-Seyyid Ali Efendi, İmâm Mehmed Efendi b. Mustafa, el-Hâc Mustafa b. el-Hâc Ali, Memiş Çelebi b. Mustafa, Salih Çelebi b. Mehmed, Ahmed Efendi b. Mustafa.