Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 414 Hüküm no: 487 Orijinal metin no: [65b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Bektaş’ın, evini Hasan Ağa b. el-Hâc Nimet’e sattığı Husûs-ı âti’l-beyânın mahallinde tahrîri iltimâs olunmağın kıbel-i şer‘den mevlânâ keşfî Mustafa Efendi irsâl olunup ol dahi zahru’l-eşbâh işbu bâ‘isü’l-kitâb Hasan Ağa b. el-Hâc Nimet’in mahmiye-i İstanbul’da Zeyrek mahallesinde sâkin olduğu menzile varıp zeyl-i vesîkada isimleri muharrer olan müslimîn huzûrunda akd-i meclis-i şer‘-i şerîf eyledikde vilâyet-i Anadolu’da medîne-i Tire’de Murtaza Ağa mahallesinde sâkin Hasan Efendi b. Mehmed Ağa ile vâlidesi olup zâtı Mehmed Çavuş b. Yusuf ve Ömer Çavuş b. Ahmed ta‘rîfleri ile mu‘arrefe olan Fâtıma Hâtun bt. Bektaş meclis-i ma‘kūd-ı mezbûrda müşârün-ileyh Hasan Ağa mahzarında her biri ikrâr ve takrîr-i kelâm edip işbu akdin sudûruna değin iştirâk-i seviy üzre silk-i mülkümüzde münselik olup zikr olunan Murtaza Ağa mahallesinde vâki‘ bir tarafı Çavuşzâde Mustafa Çelebi mülkü ve bir tarafı Ahmed Çavuş mülkü ve iki tarafı tarîk-i âm ile mahdûd hâriciyyede iki bâb fevkānî odaları ve kanavât-ı müsennât ile muhrez bir masura mâ-i cârî ve eşcâr-ı müsmire ve gayr-ı müsmire hadîkayı ve dâhiliyyede bir bâb fevkānî ve iki bâb tahtânî odaları ve tahtında mahzen ve kanavât-ı müsennât ile muhrez bir masura mâ-i cârî ve eşcâr-ı müsmire ve gayrı müsmire bahçeyi müştemil menzilimi cemî‘ tevâbi‘ ve levâhıkı ile iki bin iki yüz elli esedî guruşa müşârün-ileyh Hasan Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi iştirâ ve kabûl edip semen-i mezbûrun beş yüz elli guruşunu nakid aldığımızdan sonra semen-i bâkīsi bin yedi yüz esedî guruşu mezbûr Hasan Ağa’nın bizim zimmetimizde on iki bâfteli bir mücevher kuşak semeninden hakkı olan iki yüz guruş ve bir ön mücevher kuşak semeninden hakkı olan elli esedî guruş ve üç sâ‘at semenlerinden hakkı olan yüz elli guruş ve beş sîm kılıç ve üç sîm topuz ve beş sîm gaddâre ve beş sîm raht semenlerinden olan dokuz yüz esedî guruş ve on dokuz bakır ibrik ve yüz otuza bir kahve ibriği ve yüz doksan bir bakır sahan ve otuz aded sahan kapağı semenlerinden hakkı olan dört yüz esedî guruş cem‘an eşyâ-i mezbûrenin semenleri olan bin yedi yüz guruşa takās edip ol dahi mukāssa ettiğinden sonra menzil-i mezbûru mahallinde kabza müşârün-ileyh es-Seyyid Hasan Ağa’yı taslît eyledik min ba‘d menzil-i mezbûr müşârün-ileyh Hasan Ağa’nın mülk-i müşterâsıdır keyfe mâ yeşâ’ ve yahtâr mutasarrıf olsun dediklerinde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan muhzır Hüseyin ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-âşir min Recebi’l-ferd li sene seb‘a ve seb‘în ve elf. Şuhûdü’l-hâl: Fahrü’l-müderrisîni’l-kirâm Sâlih Efendi, Mehmed Efendi b. İbrahim el-Müderris, Mehmed Efendi b. Yusuf, Mehmed Çelebi b. Bayezid, Mustafa Efendi [b.] Kemal, İbrahim Çavuş b. Abdünnebi, es-Seyyid Musli Çelebi b. es-Seyyid Mustafa.