Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 415 Hüküm no: 488 Orijinal metin no: [65b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maryora bt. Andriye’nin Nasuh Bey Vakfı’ndan aldığı ödünce karşılık evini rehin verdiği Mahmiye-i İstanbul’da Emin Bey mahallesinde sâkine Maryora bt. Andriye nâm nasrâniye tarafından husûs-ı âti’l-beyâna vekîl-i müsecceli olan zevci Takar v. Aleksandri nâm zimmî meclis-i şer‘de mahmiye-i mezbûrda bi’l-fi‘l merhûm Nasuh Bey vakfı’na mütevellî olan bâ‘isü’l-kitâb Ahmed Çelebi b. Hüseyin Efendi mahzarında vekâleten ikrâr ve takrîr-i kelâm edip zevcem mezbûrenin vakf-ı mezbûra cihet-i deyn-i şer‘îden zimmetinde olan yüz kıt‘a tâmmü’l-vezn riyâlî guruş ile yedişer buçuk dirhem seksen riyâlî guruş ve semeni târih-i kitâb senesi Receb’i gurresinden bir sene tamâmına değin müeccel ve mev‘ûdların zirâ‘ı beynlerinde ma‘lûm mütevellî-i mezbûr yedinden müşterâ ve makbûz çuka bahâsından on sekiz kıt‘a riyâlî guruş cem‘an zimmetinde yüz doksan sekiz kıt‘a riyâlî guruş deyni olup meblağ-ı mezbûr mukābelesinde müvekkile-i mezbûrenin silk-i mülkünde münselik mahalle-i mezbûrda vâki‘ bir tarafdan Dimitraki mülkü ve bir tarafdan hayyât Yani mülkü ve bir tarafdan müvekkile-i mezbûre mülkü ve bir tarafdan tarîk-i âm ile mahdûd mülk menzilimin arsasını mütevellî-i mezbûra rehn vaz‘ ve teslîm ol dahi irtihân ve kabûl eyledi dedikde gıbbe’t-tasdîki’ş-şer‘î vekîl-i mezbûr Takar’ı meblağ-ı mezbûr yüz doksan sekiz riyâlî guruşa emr [ve] kabûlü hâviye kefâlet-i sahîha-i şer‘iyye ile kefîl oldukda mâ vaka‘a bi’t-taleb ketb olundu. Fi’l-yevmi’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: eş-Şeyh Mehmed Efendi [b.] Abdülkerim, Mehmed Çelebi b. Osman, Ahmed Çelebi b. Mustafa, Abdullah Çelebi b. Resul, Osman Çelebi b. Abdurrahman, Abdurrahman b. Mehmed, Mehmed b. Abdurrahman, Ali Dede b. Musa.