Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 415 Hüküm no: 489 Orijinal metin no: [65b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Yusuf’un aldığı câriyeyi Esirci Hızır’a geri teslim edip parasını almadığı ile ilgili davada haklı olduğu Mahmiye-i İstanbul’da İbrahim Paşa mahallesinde sâkine işbu bâ‘isetü’l-kitâb Sâliha bt. Yusuf Bey nâm hâtun meclis-i şer‘-i hatîr-i lâzımü’t-tevkīrde esirci tâifesinden Hızır b. Durmuş nâm kimesne mahzarında üzerine da‘vâ ve takrîr-i kelâm edip mezbûr Hızır evsâfı beynimizde ma‘lûme Rûsiyyetü’l-asl Mülâyim bt. Abdullah nâm câriyesini altmış sekiz esedî guruş semen-i makbûza bana bey‘ ve teslîm ben dahi vech-i muharrer üzre iştirâ ve kabûl ve tesellüm eyledikden sonra câriye-i mezbûr ma‘yûbe olmağla rızâmız ile bey‘-i mezbûru fesh ve ikāle edip ol dahi ba‘de’l-ikāle câriye-i mezbûreyi yedimden alıp kabûl ve semen-i mezkûr zimmetinde kalmış idi suâl olunup semen-i mezbûr altmış sekiz esedî guruş mezbûr Hızır’dan alıverilmesi matlûbumdur dedikde, gıbbe’s-suâl mezbûr Hızır zikr olunan câriyeyi bey‘ ve kabz-ı semen eylediğini ikrâr edip vech-i muharrer üzre ikāleyi inkâr etmeğin müdde‘iyye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin câriye-i mevsûfeyi ba‘de’l-bey‘ yine müdde‘iyye-i mezbûre ile bey‘-i mezbûru ikāle etmediğine mezbûr Hızır’a yemîn teklîf olundukda nükûl etmeğin mûcebince meblağ-ı mezbûr altmış sekiz esedî guruşu müdde‘iyye-i mezbûreye def‘ ve teslîme mezbûr Hızır’a ba‘de’t-tenbîh mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: İbrahim Çelebi b. Mehmed Bey, Hasan Çelebi b. Ahmed, Mustafa Çelebi b. Ahmed, Baba Resul [b.] Rıdvan.