Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 155 Hüküm no: 107 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryako v. Avril’in küçük çocukları Yorgaki ve Dimitraki’ye nafaka tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî- mahallâtından Topkapısı hâricinde vâki‘ Emânî Çelebi mahallesinde mütemekkin iken bundan akdem hâlik [olan] Kiryako v. Avril nâm zimmînin sulbî sagīr oğulları Yorgaki ve Dimitraki’nin anaları ve tesviye-i emirlerine vasîleri olan işbu râfi‘atü’s-sifr Fotora bt. Sabina nâm Nasrâniye meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîleri olduğum sagīrân-ı mezbûrânın nafaka ve kisve-bahâya eşedd-i ihtiyâcı olmağla babaları hâlik-i mersûmdan müntakıl mâllarından her birine kadr-ı ma‘rûf nafaka ve kisve-[bahâ]<> farz ve takdîr olunmak matlûbumdur dedikde vasîyy-i mezbûrenin kelimât-ı meşrûhası vâkı‘a mutâbıka idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīrân-ı mezbûrânın babaları hâlik-i <> mersûmdan müntakıl mâllarından her birine yevmî ikişer para nafaka ve kisve-bahâ farz ve takdîr buyurup meblağ-ı mefrûz-ı mezbûru sagīrân-ı mezbûrânın nafaka ve kisve-bahâlarına harc ve sarfa ve lede’l-iktizâ istidâneye ve inde’z-zafer mâllarına rücû‘a vasîyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Zilhicceti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: es-Seyyid Mehmed b. es-Seyyid Mustafa, İsmail Çelebi b. Ahmed, es-Seyyid Ahmed b. es-Seyyid Mehmed, Hasan Çelebi b. Ali, Ahmed Çelebi b. Mustafa, Ali Beşe b., Milo v. Niko, Anaştaş v. Yani, Kostantın v. Yorgi, Petro v. Yako, Arslan v. Hristo.