Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 157 Hüküm no: 109 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Sefer’in küçük kızı Lübabe’nin, babasından miras kalan evdeki hissesinin satışına mahkeme tarafından izin verildiği Havâss-ı Refî‘a kazâsı muzâfâtından kasaba-i Hasköy’de Keçeci el-Hâc Mehmed mahallesinde sâkin iken bundan akdem vefât eden el-Hâc Ali b. Sefer’in verâseti zevce-i menkûha-i metrûkesi Rukiye Hatun bt. Süleyman ile sulbî kebîr oğlu Mehmed ve sagīr oğlu Mustafa’ya ve sulbiye sagīre kızı Lübâbe’ye münhasıra ve tashîh-i mes’elesi kırk sehimden i‘tibâr olunup sihâm-ı mezbûreden beş sehmi zevcesi mezbûre Rukiye Hatun’a ve on dörder sehmi oğulları mezbûrân Mehmed ve Mustafa’ya ve bâkī yedi sehmi sagīre-i mezbûre Lübâbe’ye isâbeti tahakkukundan sonra sagīre-i mezbûre Lübâbe’nin vâlidesi ve tesviye-i emrine vasiyyesi olup zâtı ta‘rîf-i şer‘î ile mu‘arrefe olan mezbûre Rukiye Hatun bt. Süleyman meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîsi olduğum sagīre-i mezbûrenin babası müteveffâ-yı mezbûrdan müntakıl mahalle-i mezbûrede vâki‘ inde’l-ahâlî ve’l-cîrân ma‘lûmü’l-hudûd ve’l-müştemilât mülk menzilden verese-i kibâr hisselerini âhara bey‘ <> murâd ettiklerinde sagīre-i mezbûrenin <> menzil-i mahdûd-ı mezkûrda olan yedi sehim hissesi ifrâz mümkün olmadığından mâ‘dâ harâba müşrif olup nafaka ve kisveye dahi eşedd-i ihtiyâcı olmağla verese-i kibârın hissesiyle ma‘an sagīre-i mezbûre Lübâbe’nin yedi sehim hissesi âhar[a] bey‘ ve semeni istirbâh olunmak sagīre-i mezbûre hakkında her vechile enfa‘ ve evlâ olmağın menzil-i mahdûd-ı mezkûrda olan sagīre-i mezbûrenin yedi sehim hissesi sûk-ı sultânîde ba‘de’l-müzâyede ve inkıtâ‘ı’r-rağbe semen-i misli ile âhara bey‘ ve semeni istirbâh olunmak <> üzere kıbel-i şer‘den izin verilmek bi’l-vesâye matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīre-i mezbûrenin yedi sehim hissesini ba‘de’l-müzâyede ve inkıtâ‘ı’r-rağbe semeni [semen-i] misli ile âhara bey‘ ve semeni istirbâh olunmak üzere vasîyy-i mezbûra izin vermeğin [38a] mâ-vaka‘a bi’t-taleb ketb olundu. Fi’l-yevmi’t-tâsi‘-aşer min-Zilka‘deti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: Mustafa Efendi b. İbrahim, Hüseyin Bey b. Abdullah, Yusuf Çelebi b. Veli, Halil b. el-müezzin, Abdurrahman b. Kapudan, Hüseyin b. Nuh, Mehmed b. Ali.