Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 158 Hüküm no: 110 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Sefer’in oğlu Mehmed ile küçük kızı Lübabe’nin, babalarından miras kalan evdeki hisselerinin Mehmed Çelebi b. Abdullah’a satıldığı Havâss-ı Refî‘a kazâsı muzâfâtından kasaba-i Hasköy’de Keçeci el-Hâc Mehmed mahallesinde sâkin iken bundan akdem vefât eden el-Hâc Ali b. Sefer’in verâseti zevce-i menkûha-i metrûkesi Rukiye Hatun bt. Süleyman ile sulbî kebîr oğlu Mehmed ve sagīr oğlu Mustafa ve sulbiye sagīre kızı Lübâbe’ye münhasıra ve tashîh-i mes’elesi kırk sehimden i‘tibâr olunup sihâm-ı mezbûreden beş sehmi zevcesi mezbûre Rukiye Hatun’a ve on dörder sehmi oğulları mezbûrân Mehmed ve Mustafa’ya ve bâkī yedi sehmi sagīre-i mezbûre Lübâbe’ye isâbet[i] tahakkukundan sonra sagīre-i mezbûre Lübâbe’nin vâlidesi ve tesviye-i emrine vasiyyesi olup zâtı ta‘rîf-i şer‘î ile mu‘arrefe olan mezbûre Rukiye Hatun ile mezbûr Mehmed meclis-i şer‘-i şerîf-i enverde işbu râfi‘u’l-kitâb diğer Mehmed Çelebi b. Abdullah mahzarında her biri bi’l-verâse ve bi’l-vesâye ikrâr ve takrîr-i kelâm edüp müteveffâ-yı mezbûrun [mezbûrun] ile’l-vefât yedinde mülk ve hakkı idüği müsbet olup mahalle-i mezbûrede vâki‘ bir tarafdan Odabaşı menzili ve bir tarafdan Hamide Hatun menzili ve bir tarafdan Ok Meydânı ve bir tarafdan tarîk-ı hâs ile mahdûd fevkānî üç bâb oda ve bir bâb tahtânî oda ve bir matbah ve kenîf ve su kuyusu ve ahır ve bahçeyi müştemil mülk menzilden verese-i kibâr hisselerini âhara bey‘ murâd edüp sagīre-i mezbûrenin menzil-i mahdûd-ı mezkûrda olan yedi sehim hissesi kābil-i taksîm olmadığından mâ‘dâ harâba müşrif olup hâsıl[ı] harcına vefâ etmeyip nafaka ve kisveye dahi eşedd-i ihtiyâcı olmağla menzil-i mahdûd-ı mezkûrda olan merkūm Mehmed’in on dört sehim hissesiyle ma‘an sagīre-i mezbûrenin yedi [sehim] hissesi bi’l-izni’ş-şer‘î sûk-ı sultânîde ve mecma‘ü’n-nâs olan mahallerde nidâ ve müzâyede olunup ragabât-ı nâs bi’l-külliye munkatı‘a oldukdan sonra diğer mezbûr Mehmed Çelebi üzerinde yüz seksen guruşda karâr edüp ziyâde ile tâlib-i âhar zuhûr etmeyip ve meblağ-ı mezbûr menzil-i mahdûd-ı mezkûrda olan mezbûr Mehmed’in on dört sehim hissesi ve sagīre-i mezbûre Lübâbe’nin yedi sehim hissesi cemî‘ tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûr diğer Mehmed Çelebi[‘ye] yüz seksen guruşa her biri bi’l-verâse ve bi’l-vesâye bey‘ ve temlîk ve teslîm eylediklerinde onlar [ol] dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semen[i] olan meblağ-ı mezbûr yüz seksen guruşu diğer mezbûr Mehmed Çelebi yedinden her birimiz bi’l-verâse ve bi’l-vesâye bi-kadri’l-hısas alıp kabz edüp ba‘de’l-yevm menzil-i mahdûd-ı mezkûrda mezbûr Mehmed’in on dört sehim hissesi ve sagīre-i mezbûre Lübâbe’nin yedi sehim hissesi mezbûr diğer Mehmed Çelebi’nin mülk-i müşterâsı olmuşdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis-aşer min-[Zi]lhicceti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: Mustafa Efendi b. İbrahim İmâm, Hüseyin Bey b. Abdullah, Yusuf Çelebi b. Veli, Halil b. el-müezzin, Abdurrahman Kapudan b. Ali, Hüseyin b. Nuh, Mehmed b. Ali, Mustafa b. Mehmed.