Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 159 Hüküm no: 111 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Mustafa’nın, yanında yazıcı olarak çalıştığı kar satıcısı Mehmed Çelebi b. İbrahim’e borcu bulunduğuna hükmolunduğu Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ulucababa mahallesinde sâkin <> Mehmed Çelebi b. İbrahim tarafından da‘vâya vekîl olduğu Mustafa Çelebi b. İbrahim ve İsmail b. Musa şehâdetleriyle sâbit olan işbu râfi‘u’l-kitâb Mehmed Efendi b. Mehmed meclis-i şer‘-i şerîf-i enverde mahalle-i mezbûrede sâkin iken bundan akdem vefât eden Mehmed Çelebi b. Mustafa’nın vâlidesi olup zâtı ta‘rîf-i şer‘î ile mu‘arrefe olan Fâtıma Hatun bt. Mustafa mahzarında bi’l-vekâle <> üzerine da‘vâ ve takrîr-i kelâm edüp müteveffâ-yı mezbûr Mehmed Çelebi b. Mustafa b. Abdullah hâl-i hayatında ve kemâl-i akıl [ve] sıhhatinde fevtinden dört sene mukaddem kar füruhtu husûsunda müvekkilim mezbûrun yazıcısı olmağla ma‘lûmü’l-esâmî şerbetcilere füruht olunan kar semeninden müteveffâ-yı mezbûrun makbûz [ve] masrûfunun hesâbı görüldükde ba‘de külli’l-hesâb yüz elli beş guruş zimmetinde edâsı lâzım deyni olduğunu ikrâr dahi edüp kable’l-edâ fevt olmağla terekesinden bi’l-vekâle taleb ederim, suâl olunsun dedikde gıbbe’s-suâl ve’l-inkâr vekîl-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahalle-i mezbûre sâkinlerinden Mustafa Çelebi b. İbrahim ve İsmail b. Musa nâm kimesneler li-ecli’ş-şehâde meclis-i şer‘a hâzırân olup isre’l-istişhâd, fi’l-hakīka müteveffâ-yı mezbûr Mehmed Çelebi b. Mustafa b. Abdullah hâl-i hayatında ve kemâl-i akıl [ve] sıhhatinde fevtinden dört sene mukaddem müvekkil-i mezbûrun yazıcılık hizmetinde olmağla ma‘lûmü’l-esâmî şerbetcilere füruht olunan kar bahâsından ba‘de külli’l-hesâb zimmetinde yüz elli guruş deyni olduğunu bizim huzûrumuzda kirâren [kirâren] ve mirâren ikrâr ve bizi işhâd eyledi; biz bu husûsa bu vech üzere şâhidleriz; şehâdet dahi ederiz [38b] deyü her biri edâ-i şehâdet-i şer‘iye ettikde ba‘de’t-ta‘dîl ve’t-tezkiye şehâdetleri makbûle olmağın mevkūfen alâ-yemîni’l-müvekkili’l-merkūm mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-Zilhicceti’ş-şerîfe li-seneti seb‘a ve erba‘în ve miete ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa Efendi, es-Seyyid Ahmed Efendi b. Abdurrahim, es-Seyyid Mehmed b. es-Seyyid Mustafa, Yahya Efendi b. Mustafa ve gayruhum mine’l-huzzâr.