Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 160 Hüküm no: 112 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahri Yusuf Bey b. Ali’nin küçük oğulları Emrullah ve Feyzullah’ın, babalarından miras kalan evdeki hisselerinin Mehmed Ağa b. İbrahim’e satıldığı Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde vâki‘ Mustafa Ağa b. İbrahim’in menziline varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde medîne-i mezbûrede Musa Çavuş mahallesinde sâkin iken bundan akdem vefât eden Bahri Yusuf Bey b. Ali’nin verâseti zevce-i menkûha-i metrûke[si] Hadîce Hatun bt. Abdullah ile sulbî sagīr oğulları Emrullah ve Feyzullah ve sulbiye kebîre kızları Fâtıma ve Âişe’ye münhasıra ve tashîh-i mes’eleleri kırk sekiz sehimden i‘tibâr olunup sihâm-ı mezbûreden altı sehmi zevcesi mezbûreye ve on dörder sehmi oğulları mezbûrândan her birine ve yedişer sehmi kızları mezbûrândan her birine isâbeti tahakkukundan sonra sagīrân-ı mezbûrânın vâlideleri ve tesviye-i emirlerine kıbel-i şer‘den mansûb vasîleri olup zâtı ta‘rîf-i şer‘î ile mu‘arrefe olan mezbûre Hadîce Hatun meclis-i ma‘kūd-ı mezkûrda işbu râfi‘u’l-kitâb Mehmed Ağa b. İbrahim mahzarında bi’l-vesâye ikrâr ve takrîr-i kelâm edüp müteveffâ-yı mezbûrun ile’l-vefât yedinde mülk ve hakkı idüği müsbet olup mârrü’z-zikr Musa Çavuş mahallesinde vâki‘ bir tarafdan ba‘zan İmâm Abdullah Efendi ve ba‘zan Kadifecizâde menzili ve ba‘zan Süleyman Çelebi menzili ve bir tarafdan Dellâle Âişe Hatun menzili ve ba‘zan Müezzin Çelebi menzili ve bir tarafdan tarîk-ı hâs ve bir tarafdan tarîk-ı âm ile mahdûd hâriciyesinde iki bâb oda ve bir köşk ve dâhiliyesinde üç bâb tahtânî oda ve bir havuz ve bir matbah ve iki su kuyusu ve kenîf ve bahçeyi muhtevî menzilden sagīrân-ı mezbûrânın on dörder sehim hisseleri harâba müşrif olup hâsılı harcına vefâ etmediğinden mâ‘dâ nafaka ve kisveye eşedd-i ihtiyâc[lar]ı olmağla menzil-i mahdûd-ı mezkûrda olan yirmi sekiz sehim hisseleri sûk-ı sultânîde ba‘de’l-müzâyede ve inkıtâ‘ı’r-rağbe semen-i misli ile âhara bey‘ ve semen[i] istirbâh olunmak sagīrân-ı mezbûrân haklarında her vechile enfa‘ ve evlâ olduğu zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra hisse-i mezkûr bi’l-izni’ş-şer‘î sûk-ı sultânîde müzâyede olunup ragabâtü’n-nâs bi’l-külliye munkatı‘a oldukdan sonra mezbûr Mehmed Ağa üzerinde yirmi sekiz bin akçede karâr edüp ziyâde ile tâlib-i âhar zuhûr etmemeğin sagīrân-ı mezbûrânın yirmi sekiz sehim hisselerini tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûr Mehmed Ağa’ya semen-i misli olan meblağ-ı mezbûr yirmi sekiz bin akçeye bi’l-vesâye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semen[i] olan meblağ-ı mezbûr yirmi sekiz bin akçeyi mezbûr Mehmed Ağa yedinden bi’l-vesâye alıp kabz edüp ba‘de’l-yevm menzil-i mahdûd-ı mezkûrda olan sagīrân-ı mezbûrânın yirmi sekiz sehim hisseleri mezbûr Mehmed Ağa’nın mülk-i müşterâsı ve hakk-ı sırfı olmuşdur <> dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr İsmail Çelebi ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 20 min-Zilka‘de sene 1147. Şuhûdü’l-hâl: Mustafa Ağa b. İbrahim, Hüseyin Ağa b. Mustafa, Yusuf Bey b. Mustafa, İbrahim Bey b. Selim, İbrahim Çelebi b. Mehmed, Ahmed Çelebi b..