Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 416 Hüküm no: 491 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İshak Bey b. Hamza’nın değirmenini Hızır Bey b. Derya’ya sattığı ve alacağını taksitlendirdiği Mahmiye-i Kostantıniyye hısn-ı ebvâbından Unkapanıkapısı dâhilinde Arabacılar mahallesi sâkinlerinden İshak Bey b. Hamza nâm bevvâb-ı sultânî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda kız karındaşı oğlu işbu bâ‘isü’l-kitâb Hızır Bey b. Derya mahzarında bi’t-tav‘i’s-sâf ikrâr ve i‘tirâf edip bey‘-i âti’z-zikrin sudûruna değin yedimde mülküm ve hakkım olup vilâyet-i Rumeli’nde Ferecik kazâsına tâbi‘ Yelkenci nâm karye sınırında vâki‘ karye-i mezbûre kurbunda cârî Yelkenci Suyu demekle ma‘rûf nehr-i cârî üzerinde dâir beynimizde ma‘lûmü’l-hudûd bir göz değirmen tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile nakid râyic fi’l-vakt on bin akçeye mezbûr Hızır Bey’e bey‘ edip ol dahi iştirâ ve kabûl eyledikden sonra semen-i mezkûru def‘aten edâya iktidârı olmayıp taksîte tâlib olmağla her sene bana beş yüz akçe edâ ve teslîm eylemek üzre târih-i kitâbdan yirmi sene tamâmına değin semen-i mezkûru taksît edip zikr olunan değirmeni mahallinde ahz u kabza merkūm Hızır Bey’i taslît eyledim zikr olunan değirmen merkūm Hızır Bey’in mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Recebi’l-mürecceb li sene seb‘a ve seb‘în ve elf. Şuhûdü’l-hâl: Ahmed Efendi el-Cündî, Berber İlyas [b.] Mehmed Beşe, harkçı Mehmed Beşe, Mehmed Çelebi b. Abdullah, İbrahim Çelebi b. Ahmed.