Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 190 Hüküm no: 133 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun bt. Mehmed Ağa’dan küçük kızı Atiyetullah’a intikal eden Şerife Ayşe Hatun Vakfı’ndan kiralı harap evin başkasına devrine mahkeme tarafından izin verildiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Fethi Çelebi mahallesinde sâkine iken bundan akdem vefât eden Rukiye Hatun bt. Mehmed Ağa’nın sadriye sagīre kızı Atiyyetullah’ın babası ve vasîsi olan işbu bâ‘isü’l-kitâb fahrü’l-müderrisîni’l-kirâm Feyz[ullah] Efendi b. el-merhûm Abdülbaki Efendi meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp Merhûme Şerîfe Âişe Hatun Vakfı’ndan icâreteyn-i ma‘lûmeteyn ile müteveffiye-i mezbûrenin ile’l-vefât taht-ı tasarrufunda olup ba‘de vefâtihâ sagīre-i mezbûreye intikāl-i âdî ile intikāl edüp mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât vakıf menzil müşrif-i harâb ve mâil-i türâb olduğundan mâ‘dâ hâsılı harcına vefâ etmeyip sagīre-i mezbûrenin dahi ta‘mîr ve termîmine mal-ı müntakılesi olmamağla menzil-i mezkûru bedel-i misli ve ma‘rifet-i mütevellî ile âhara ferâğ ve bedeli istirbâh olunmak sagīre-i mezbûre hakkında min-külli’l-vücûh evlâ ve enfa‘ olmağın menzil-i mezkûru ba‘de’l-müzâyede ve inkıtâ‘ı’r-rağbe bedel-i misli ve ma‘rifet-i mütevellî ile âhara ferâğa kıbel-i şer‘den izin verilmek matlûbumdur dedikde vasîyy-i mûmâ-ileyh Feyzullah Efendi’nin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri menzil-i [46b] mezkûru ba‘de’l-müzâyede ve inkıtâ‘ı’r-rağbe bedel-i misli ve ma‘rifet-i mütevellî ile âhara ferâğ ve bedel[i] istirbâh olunmak üzere vasîyy-i mûmâ-ileyh Feyzullah Efendi’ye izin vermeğin mâ-vaka‘a bi’t-taleb ketb olundu. Fi’l-yevmi’s-sâdis-aşer min-Cumâdelûlâ li-seneti semân ve erba‘în ve miete ve elf. Şuhûdü’l-hâl: es-Seyyid Yahya Efendi b. el-Hâc İbrahim Efendi, Mustafa Efendi b. Hüseyin, Ahmed Efendi b. Mustafa, el-Hâc Halil b. Ali, Yusuf Ağa b. Mustafa.