Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 417 Hüküm no: 493 Orijinal metin no: [66a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Borçlu olarak ölen Mehterbaşı Mustafa Ağa’nın evinin, vârisler tarafından Mehmed Paşa’nın kızı Hatice Hatun’a satıldığı Mahmiye-i İstanbul’da Kabasakal Sinan Ağa mahallesi ahâlîsinden olup bundan akdem medyûnen vefât eden mehterbaşı Mustafa Ağa b. Ali’nin verâseti zevce-i metrûkeleri Âişe bt. Ali ve Bedehşan bt. Ali ve Nâziki bt. Abdullah nâm hâtunlar ile sulbiye sagīre kızı Fâtıma bt. ( ) ve li ebeveyn er karındaşı İlyas Ağa’ya münhasıra olduğu şer‘an sâbit ve mütehakkik oldukdan sonra mezbûr İlyas Ağa asâleten ve sagīre-i mezbûrenin kıbel-i şer‘den mansûb vasîsi olup mezbûrât Âişe ve Bedehşan ve Nâziki taraflarından husûs-ı âti’l-beyâna vekîl olup zâtları ma‘rifet-i şer‘iyye ile ârifân mahalle-i mezbûre sükkânından müezzin Abdullah Efendi b. Hasan ve Mehmed Bey b. Ali nâm kimesneler şehâdetleriyle şer‘an vekâleti sâbit olan el-Hâc Mehmed Ağa b. Mustafa nâm kimesne vesâyeten ve vekâleten meclis-i şer‘-i hatîr-i lâzımü’t-tevkīrde umdetü’l-muhadderât zübdetü’l-muvakkarât aliyyetü’z-zât safiyyetü’s-sıfât bâ‘isetü’l-kitâb Hatice Hanım bt. el-merhûm ed-dâricü ilâ medârici rahmeti Rabbihi’l-kayyûm Köprülü Mehmed Paşa tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mehmed Ağa b. Pîrî ve Yakub Ağa b. Ali nâm kimesneler şehâdetleriyle şer‘an sâbit olan diğer Mehmed Ağa b. Ali nâm kimesne mahzarında her biri ikrâr ve takrîr-i kelâm edip müteveffâ-yı mezbûrun menkūl olan terekesi düyûn-ı müsbetesine vefâ etmeyip akārı bey‘ olunmak lâzım gelmekle tereke-i müteveffâ-yı mezbûrdan olup mahalle-i mezbûrda vâki‘ etrâf-ı erba‘adan Ali Ağa kızı Ümmühâni Hâtun menzili ve Abdülmümin Ağa menzili ve Vâlide Sultan kethüdâsı Mustafa Efendi menzili ve kapıcılar kethüdâsı İbrahim Ağa menzili ve Yusuf Ağa menzili ve Cellâd Dilsiz ve Mehmed Ağa ve Hokkabâz Dilsiz menzilleri ve Hâfız-ı Kur’ân Mustafa Ağa menzili ve tarîk-i âm ile mahdûd hâriciyyesinde on bâb fevkānî odalar ve bir orta sofa ve iki bâb sofa ve iki bâb oda ve bir ahır ve bir samanhâne ve bir matbah ve beş kenîf ve dâhiliyyesinde beş bâb fevkānî oda ve iki bâb tahtânî oda ve bir havuz ve bir köşk ve bir matbah ve dört kurnalı bir havuzlu hamam ve bir hamam odası ve bir kiler [ve] kebîr mahzen ve dört kenîf ve dâhiliyye ve hâriciyye beyninde bir bahçe ve kanavât-ı müsennât-ı memlûke ile muhrez dâhiliyyede bir yerde ve hâriciyyede üç yerde cârî cümlesi bir masura suyu müştemil mülk menzil ba‘de’l-müzâyede ve inkıtâ‘i’r-rağbe semen-i misli on altı bin esedî guruşa vekîl-i mezbûr diğer Mehmed Ağa’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bey‘ ve teslîm edip ol dahi müvekkilesi müşârün-ileyhâ Hatice Hanım için iştirâ ve tesellüm eyledikden sonra semen-i mezbûru vekîl-i merkūm Mehmed Ağa yedinden tamâmen ahz u kabz eyledik min ba‘d menzil-i mezbûr müşârün-ileyhâ Hatice Hanım hazretlerinin mülk-i müşterâlarıdır keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Umdetü’l-emâcid ve’l-ekârim Mahmud Ağa b. Hasan Emîn-i gümrük hâlâ, zübdetü’l-a‘yân …? Mustafa Ağa, mefharü erbâbi’t-tahrîr ve’l-kalem Tersâne Emîni Süleyman, fahrü’l-emâsil ve’l-eşbâh Haraçcı Hasan Ağa, Mehmed Efendi b. Ahmed el-İmâm, Ahmed Bey b. Yakub, el-Hâc Bâli b. Yakub, Abdurrahman Efendi b. Mahmud el-İmâm, Mehmed Bey b. Sadık, Ramazan b. Ali, Abdullah Halîfe b. ( ) el-Müezzin.