Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 419 Hüküm no: 494 Orijinal metin no: [66a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ahmed Ağa’ya borcu olan Kaplan Paşa’nın bunu havale ettiği Osman Paşa tarafından vârislerine ödenmesi Mahmiye-i İstanbul’da Karagümrük kurbunda ( ) mahallesi ahâlîsinden olup bundan akdem medîne-i Bağdad’da vefât eden Ahmed Ağa b. ( ) verâseti zevce-i metrûkesi Fâtıma bt. İbrahim nâm hâtun ile sulbî sagīr oğlu Derviş Mehmed’e münhasıra olduğu şer‘an sâbit ve mütehakkik oldukdan sonra mezbûre Fâtıma kendi tarafından asâleten ve sagīr-i mezbûrun kıbel-i şer‘den mansûbe vasîsi olmağla vesâyeten dîvân-ı kāimmakām-ı hazret-i a‘zamîde akd olunan meclis-i şer‘-i âlîde hâlâ kapudân olan düstûr-ı ekrem müşîr-i efham vezîr-i rûşen-zamîr Kaplan Paşa -dâme birruhû ve feşâ- taraflarından husûs-ı âti’l-beyâna vekîl olup hâlâ çavuşbaşı olan İsmail Ağa b. ( ) ve Mehmed Çavuş b. Mehmed nâm kimesneler şehâdetleri ile şer‘an vekâleti sâbite olan İlyas Ağa b. Mahmud nâm kimesne mahzarında da‘vâ ve takrîr-i kelâm edip müteveffâ-yı mezbûrun müvekkil-i müşârün-ileyh Kaplan Paşa zimmetinde karz-ı şer‘îden hakkı olan bin üç yüz esedî guruşun beş yüz elli esedî guruşunu müvekkil-i müşârün-ileyhin emriyle sâbıkan …? başı olan Osman Paşa bana edâ ve teslîm edip bâkī yedi yüz elli guruşu zimmetinde kalmağla hâlâ meblağ-ı bâkī-i mezbûru müvekkil-i müşârün-ileyhden taleb eyleyip da‘vâ ettiğimde müvekkil-i müşârün-ileyh mezbûr Ahmed Ağa vefât ettikde vâris-i ma‘rûfu olmamağla medîne-i mezbûrda emîn-i beytülmâl olan gāib ani’l-meclis Hasan Ağa ile nâzır olan mûmâ-ileyh Osman Paşa deyn-i mezbûr için benden bin iki yüz guruş alıp bir mikdârın ol zamânda yeniçeri ağası olan Kanbur Mustafa Paşa’ya vermişler idi var anlardan al deyû vermekde te‘allül eder, suâl olunup alıverilmek matlûbumdur dedikde gıbbe’s-suâl vekîl-i mezbûr cevâbında müvekkilim müşârün-ileyh Kaplan Paşa’nın müteveffâ-yı mezbûra ancak karzdan bin esedî guruşu üzerine iltizâm olunan ribh-i şer‘îden iki yüz esedî guruşu deyni olup deyn-i mezbûrdan müdde‘iyye-i mezbûrenin vech-i muharrer üzre mûmâ-ileyh Osman Paşa’dan [66b] ahzını i‘tirâf ettiği beş yüz elli esedî guruşdan bâkīden her bir esedî guruş seksen akçe olup hurda akçe hesâbınca kırk beş bin akçe olmak üzre bundan akdem müşârün-ileyh Kanbur Mustafa Paşa müvekkil-i müşârün-ileyhin âdemi ile deyn-i mezbûrun beş yüz altmış iki buçuk guruşunu dahi müdde‘iyye-i mezbûreye edâ edip meblağ-ı bâkī seksen yedi buçuk esedî guruşu mûmâ-ileyh Osman Paşa’dan havâle-i şer‘iyye ile havâle etmişdir deyû müdde‘iyye-i mezbûreyi ba‘zı müdde‘âsında def‘le mukābele edip ziyâde yüz guruşu inkâr edicek müdde‘iyye-i mezbûreden ziyâde da‘vâsı için ve vekîl-i mezbûrdan def‘-i mezbûru için beyyine taleb olundukda her biri ityân-ı beyyine için istimhâl etmeleri ile mehl-i şer‘î ile imhâl olundukdan sonra mûmâ-ileyh Osman Paşa havâle-i mezbûreyi ikrâr etmeğin mûcebince vekîl-i mezbûrun ikrârı mertebesinden bâkī seksen yedi buçuk esedî guruşu müdde‘iyye-i mezbûreye edâya mûmâ-ileyh Osman Paşa’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin aşer min Recebi’l-ferd li sene seb‘a ve seb‘în ve elf. Şuhûdü’l-hâl: Umdetü erbâbi’t-tahrîr ve’l-kalem Ebûbekir Efendi Tezkireci-i evvel, Fahrü erbâbi’t-tahrîr ve’r-rakam Mustafa Efendi Tezkireci-i sânî, Şaban Ağa b. Süleyman Ser-muhzırân, Eyüb Ağa b. Ahmed Kethüdâ-yı hazret-i efendi, umdetü kuzâti’l-İslâm zübdetü vülâti’l-enâm Yunus Çelebizâde Mehmed Efendi.