Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 198 Hüküm no: 140 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükköy ahalisinden Hatuya bt. Lanbo’nun, ayrıntıları yazılı olan vasiyetini yerine getirmek üzere kocası Ustuyko v. Yani’yi mahkemede vasî tayin ettiği. Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refî‘a kazâsına tâbi‘ suyolu karyelerinden Küçük nâm karyede mütemekkine Hatuya bt. Lanbo’nun mütemekkine olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde karye-i mezbûrede sâkine olup zâtı ta‘rîf-i şer‘î ile mu‘arrefe olan mersûme Hatuya meclis-i ma‘kūd-ı mezkûrda zevci işbu râfi‘u’s-sifr Ustuyko v. Yani muvâcehesinde ikrâr ve takrîr-i kelâm edüp ben bi-emrillâhi te‘âlâ hâlike olduğumda cemî‘ terekem ve zimem-i nâsda olan hukūkum ahz u kabz ve düyûn-ı müsbetem edâ olundukdan sonra bâkī kalan terekemin sülüsü ifrâz ve sülüs-i mezbûrdan kadr-ı kifâye meblağ ile lâşemi [ilkā-i] hafr içün harc ve sarf oluna ve mâ‘dâ sülüsümü dahi zevcim mersûm kendi re’yiyle vücûh-ı birre harc ü sarf eyleye deyü mersûm Ustuyko’yu vasîyy-i muhtâr nasb ve ta‘yîn edüp ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm eylediğinde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr es-Seyyid Yakub ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 29 min-Cumâdelûlâ sene 1148. Şuhûdü’l-hâl: Ahmed Efendi b. Mustafa Efendi, es-Seyyid Ahmed Efendi b. Abdurrahim, Hüseyin Çelebi b. Mehmed, Abdullah Çelebi b. İsmail, İbrahim Çelebi b. Ömer, Abdullah Çelebi, Baba Yorgi v. Yani, Andon v. Nikola, Yorgi v. Toto, İstiryo v. Yani, Yuvan v. Dimitri.