Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 199 Hüküm no: 141 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım b. Mehmed’in eşi Hatice Hatun oğlu Musa’nın, Cico Çiftliği ve yanındaki bahçede bulunan miras hisselerinin Sinan Beşe b. Ahmed’e satıldığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refî‘a kazâsına tâbi‘ Cico Çiftliği demekle ma‘rûf menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde kazâ-i mezbûreye tâbi‘ Topçular nâm karyede sâkin iken bundan akdem vefât eden el-Hâc Kasım b. Mehmed’in verâseti zevce-i menkûha-i metrûkesi Hadîce Hatun bt. Zeynel ile sulbî kebîr oğlu İbrahim’e ve sulbî sagīr oğlu Musa’ya münhasıra ve tashîh-i mes’eleleri on altı sehimden i‘tibâr olunup sihâm-ı mezbûreden iki sehmi zevcesi mezbûre Hadîce Hatun’a ve yedişer sehmi oğulları mezbûrândan her birine isâbeti tahakkukundan sonra sagīre-i mezbûrun vâlidesi ve tesviye-i umûruna <> bâ-hüccet-i şer‘iye vasiyyesi olup zâtı ta‘rîf-i şer‘î ile mu‘arrefe olan mezbûre Hadîce Hatun meclis-i ma‘kūd-ı mezkûrda işbu râfi‘u’l-kitâb Sinan Beşe b. Ahmed mahzarında bi’l-verâse ve bi’l-vesâye ikrâr ve takrîr-i kelâm [edüp] sâlifü’z-zikr çiftlikde vâki‘ hayv[â]nât? ve hınta ve alef ve mezrû‘ât ve sâir âlât-ı çift ve çiftlik-i mezbûr kurbünde vâki‘ bahçe beyne’l-hiref gedik i‘tibârıyla müteveffâ-yı mezbûrun ile’l-vefât taht-ı icâresinde mevcûd eşcâr-ı müsmire ve mağrûse lahana ve sebzevât ve âlât-ı mu‘ayyene-i mevcûdesi hırfet-i mezbûrûnun Kethudâsı Ahmed Ağa ve Çiftciler Kethudâsı el-Hâc İbrahim Ağa ve yiğitbaşılar ve müsin [ve] ihtiyâr ustaları ve zeyl-i kitâbda muharrerü’l-esâmî Müslimînin tahmîn ve takvîmleri üzere yüz elli yedi guruşa bâliğ ve semen-i misli olduğu ihbârlarıyla lede’ş-şer‘ zâhir olan meblağ-ı mezbûr yüz elli yedi guruşa mezbûr Sinan iştirâya tâlib ve râgıb olmağla çiftlik-i mezbûrda vâki‘ hayv[â]nât? ve hınta ve alef ve sâir âlât-ı çift ile bahçe-i mezbûr gediğinde mevcûd eşcâr-ı müsmire ve mağrûse lahana ve sebzevât ve âlât-ı mu‘ayyene-i mevcûdesinde tashîh-i mezbûr üzere bana ve sagīr-i mezbûr Musa’ya isâbet eden dokuz sehim hisse-i şer‘iyelerimizi tarafeynden îcâb ve kabûl[ü] hâvî bey‘i kat‘ [bey‘-i kat‘î] ile semen-i misli olan meblağ-ı mezbûr yüz elli yedi guruşa bi’l-verâse ve bi’l-vesâye mezbûr Sinan Beşe’ye bey‘ ve temlîk ve teslîm eylediğinde [eylediğimde] ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz elli yedi guruşu mezbûr Sinan Beşe yedinden bi’l-verâse ve bi’l-vesâye alıp kabz eyledim; ba‘de’l-yevm çiftlik-i mezbûrda vâki‘ hayv[â]nât? ve hınta ve alef ve mezrû‘ât ve sâir âlât-ı çift ile bahçe-i mezbûrun gediği ve mevcûd eşcâr-ı müsmire ve mağrûse lahana ve âlât-ı mu‘ayyene-i mevcûdesi mezbûr Sinan’ın mülk-i müşterâsı ve hakk-ı sırfı olmuşdur; keyfe mâ yeşâ ve hasbemâ yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr İsmail Çelebi ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Cumâdelûlâ li-seneti semân ve erba‘în ve miete ve elf. Şuhûdü’l-hâl: Ahmed Çelebi b. el-Hâc Mehmed, Mustafa Çelebi b. Mehmed, İbrahim Beşe b. Hüseyin, Halil Beşe b. Ali, Ahmed Çelebi b. İbrahim, Mahmud b. Hüseyin ve gayruhum mine’l-huzzâr.