Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 200 Hüküm no: 142 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Codur Hristo v. Tebko’nun?, Balatlıoğlu Bostanı diye bilinen bahçedeki ağaç, sebze vs. aletlerinin varisleri tarafından Tanaş v. Sebko’ya? satıldığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Eğrikapı hâricinde vâki‘ Balatlıoğlu <> Bostanı demekle ma‘rûf bahçeye varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde bahçe-i mezbûrda mütemekkin iken bundan akdem hâlik olan Codur Hristo v. Tebko’nun? verâseti zevce-i menkûha-i metrûkesi Hristini bt. Yorgi ile sulbî kebîr oğlu Yorgi’ye münhasıra olup kable’l-kısme mezbûr Yorgi dahi hâlik olup verâseti anası mezbûr Hristini ile li-üm kız karındaşları Despino ve Elina’ya ve Zotya nâm sagīreler ile ammisi gāib ani’l-beled Kristo[pe]’ye münhasıra ve tashîh-i mes’eleleri alâ-tarîkı’l-münâsahati’ş-şer‘iye yüz kırk dört sehimden i‘tibâr olunup sihâm-ı mezbûreden otuz dokuz sehmi mersûme Hristini’ye ve on dörder sehmi <> mezbûrât Despino ve Elina ve Zotya ve bâkī altmış üç sehmi ammisi mersûm Kristo[pe]’ye isâbeti [49a] tahakkukundan sonra sagīrât-ı mezbûrâtın anaları ve tesviye-i emirlerine kıbel-i şer‘den mansûbe vasiyyeleri olan mersûme Hristini ile gāib-i mezbûrun hisse-i mevkūfesini ahz u kabz [ve] zabt u hıfza vasî ve kayyım nasb olunan karındaşı oğlu İstico v. Trban? nâm zimmîler meclis-i ma‘kūd-ı mezkûrda işbu râfi‘u’s-sifr Tanaş v. Sebko? muvâcehesinde her biri bi’l-verâse ve bi’l-vesâye ikrâr ve takrîr-i kelâm edüp sâlifü’z-zikr bahçe-i mezbûrun beyne’l-hiref gedik i‘tibârıyla <> hâlik-i mersûmun ile’l-helâk taht-ı icâresinde olan bahçenin içünde mevcûd eşcâr-ı müsmire ve sebzevât-ı mağrûse ve âlât-ı mu‘ayyene-i mevcûdesi hırfet-i mezbûrûnun kethudâları ve yiğitbaşıları ve müsin [ve] ihtiyâr ustaları ve zeyl-i kitâbda muharrerü’l-esâmî Müslimînin tahmîn ve takvîmleri üzere bahçe-i mezbûrun nısfı iki yüz kırk guruşa bâliğ ve semen-i misli olduğu <> ihbârlarıyla lede’ş-şer‘ zâhir olan iki yüz kırk guruşa mersûm Tanaş iştirâya tâlib ve râgıb olmağla bahçe-i mezbûrun nısf gediğinde mevcûd eşcâr-ı müsmire ve sebzevât ve âlât-ı mevcûdesini tarafeynden îcâb ve kabûl[ü] hâvî bey‘i kat‘ [bey‘-i kat‘î] ile semen-i misli olan meblağ-ı mezbûr iki yüz kırk guruşa her biri bi’l-verâse ve bi’l-vesâye <> mesfûr Tanaş’a bey‘ ve temlîk ve teslîm eylediğinde [eylediğimizde] ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki yüz kırk guruşu mersûm Tanaş yedinden her birimiz verâseten [ve] vesâyeten alıp kabz eyledik; ba‘de’l-yevm bahçe-i mezbûrun nısf gediği ve mevcûd eşcâr ve sebzevât ve âlât-ı mevcûdesi mersûm Tanaş’ın mülk-i müşterâsı ve hakk-ı sırfı olmuşdur; keyfe mâ yeşâ ve hasbemâ yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr es-Seyyid Yakub ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 28 min-Cumâdelûlâ li-seneti semân ve erba‘în ve miete ve elf. Şuhûdü’l-hâl: Kethudâ Ahmed Ağa b. Mehmed, es-Seyyid Mustafa b. es-Seyyid Mehmed, Ahmed Beşe b. Abdurrahim, İslâm Beşe b. Hasan, es-Seyyid Ahmed b. ve gayruhum, Dimo v. ( ), Mitro v. Nikola, Tebko? v. Torado, Peter v. Nikola, Hristo v. İlo, Meskov v. Gran?, Lolo v. Boyko?, Kosta v. Triko, Hristo v. Petro, Ralmi? v. Dimitri, Milo v. Buyo, Şahin v. Biyo, Yuvan v. Martın ve gayruhum.