Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 202 Hüküm no: 144 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Codur Hristo v. Yorgi’nin varislerinden olup başka bir yerde bulunan amcası Kristope’nin miras hissesi için vasî ve kayyım tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Eğr[i]kapı hâricinde Balatlıoğlu demekle ma‘rûf bostanda mütemekkin iken bundan akdem hâlik olan Codur Hristo v. Yorgi’nin ammisi gāib ani’l-beled Kristope’nin hisse-i mevkūfesini ahz u kabz [ve] zabt u hıfza kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûfe ve istikāmet ile mevsûfe, her vechile vesâyet uhdesinden gelmeğe kādir idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfi‘u’s-sifr İstico v. Trban’ı? hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri gāib-i mezbûrun hisse-i mevkūfesini ahz u kabz ve zabt u hıfza <> mersûm İstico’yu vasî ve kayyım nasb ü ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sânî min-Cumâdelâhir li-seneti semân ve erba‘în ve miete ve elf. Şuhûdü’l-hâl: Mustafa Efendi b. Hasan, Ahmed Efendi b. Mustafa Efendi, es-Seyyid Ahmed Efendi b. es-Seyyid Abdurrahim, es-Seyyid Mehmed b. es-Seyyid Mustafa, Hüseyin Çelebi b. <> Mehmed.