Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 203 Hüküm no: 145 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi’nin varisleri olan küçük kız kardeşleri Despino, Elina ve Zotya’ya vasî tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Eğrikapı hâricinde Balatlıoğlu Bostanı demekle ma‘rûf bostanda mütemekkin iken bundan akdem hâlik olan Yorgi’nin li-üm kız karındaşları Despino ve Elina ve Zotya nâm sagīrelerin tesviye-i emirlerine kıbel-i şer‘den bir vasî nasbı lâzım ve mühim olmağın emânet ile ma‘rûfe ve istikāmet ile mevsûfe, her vechile vesâyet uhdesinden gelmeğe kādire idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīrât-ı mezbûrâtın vâlideleri işbu râfi‘atü’s-sifr Hristini v. Yorgi’yi hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīrât-ı mezbûrâtın tesviye-i umûrlarına vasî nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sânî min-Cumâdelâhir li-seneti semân ve erba‘în ve miete ve elf. Şuhûdü’l-hâl: Eş-şâhidûnü’s-sâbıkūn.